14 марта 2009 г.
Çулсерен мартăн 8-мĕшĕнче Вăрмарта «Хĕрлĕ ялав» хаçат призĕсене çĕнсе илессишĕн йĕлтĕр эстафети иртет. Акă кăçал та асăннă ăмăрту 61-мĕш хут 200 яхăн «йĕлтĕр йĕрне» кăмăллакан тĕрлĕ çулхи спортсменсене пĕр çĕре пуçтарчĕ. Çанталăкĕ чаплах пулмарĕ пулин те çĕнтерÿшĕн ăнтăлакан яш-кĕрĕмĕн хĕрÿлĕхĕ пĕрре те иксĕлмерĕ.
Кивĕ Вăрмар ялĕпе Вăрмар поселокĕ хушшинчи посадка хĕрринче йĕркелерĕç ăмăртăва. Спорт уявне хутшăнакансене оргкомитет председателĕ, район пуçлăхĕн çумĕ - вĕрентÿпе çамрăксен политикин пайĕн пуçлăхĕ Ю.Соколов саламларĕ, ăмăртура пысăк çитĕнÿсем тума сунчĕ.
Ăмăртăвăн тĕп судйи Н.Изосимов ăмăрту йĕркипе паллаштарчĕ. Спорт судйисем ăмăрту пуçланни çинчен пĕлтерсе спортсменсен пĕрремĕш ушкăнне йĕлтĕр йĕрĕ çине йыхравларĕç. 15 командăна пĕрлешнĕ çамрăксем хушшинче çивĕч тупăшу пуçланчĕ.
Эстафетăра чи малтан пиллĕкмĕшпе çиччĕмĕш классенче вĕренекен арçын ачасем те, хĕр ачасем те 2 километр чупрĕç. Ку ушкăнра пĕрремĕшпе иккĕмĕш вырăнсене Чупай шкулĕн командисем, Энĕшпуçсем виççĕмĕш вырăн йышăнчĕç.
8-9 классенче вĕренекен арçын ачасем 3 километрлă, хĕрачасем 2 километрлă дистанцие тухрĕç. Ку хутĕнче те Чупайсем - 1-мĕшсем, Энĕшпуçсем - 2-мĕш, Тикашсем - 3-мĕшсем пулчĕç.
10-11 классенче вĕренекенсем хушшинче арçын ачасен 3 километрлă, хĕрсен 2 километрлă дистанцире хăйсен пултарулăхне кăтартма тиврĕ. Ку хутĕнче те Чупайсем пĕрремĕш вырăна никама та памарĕç. Иккĕмĕш вырăна - Энĕшпуçсем, виççĕмĕш Кĕлкешсем тухрĕç.
Çитĕнсе çитнисенчен хăйсен ушкăнĕнче çĕнтерÿçĕ ятне С.Александров, Е.Вавилов (Хусан), С.Федоров, Л.Аршинова, В.Федоров, К.Иванов, З.Маркова (Кивĕ Вăрмар), Н.Михайлов, Н.Андреев (Вăрмар поселокĕ), А.Александров, В.Данилов (Кĕлкеш), Т.Ашмарина, В.Лирзай (Кавал) çĕнсе илчĕç. Спорт уявне йĕркелекенсем мала тухнă пур призерсемпе командăсене грамотăсемпе наградăларĕç, район хаçатне II-мĕш çур çула çырăнтарса пачĕç.
Юлашкинчен çак ăмăртăва йĕркелеме пулăшнăшăн район пуçлăхĕн çумне Ю.Соколова, райадминистрацин культурăпа социаллă аталану тата архив ĕçĕн тĕп специалист-экспертне А.Краснова, спорт мероприятийĕн судйисене Н.Изосимова, А.Яковлева, Л.Агапована тав сăмахĕсем калас килет. Чупай, Энĕшпуç, Кĕлкеш, Тикаш шкулĕсен командисене А.Ноздрин, Г.Исаев, Н.Изосимов, О.Мефодьев, О.Кузьмин тренерсем ăмăртусене уйрăмах лайăх хатĕрленине палăртмалла. Чупайсен командисем ăнăçлă ăмăртнинче унăн тренерĕн, шкулти физкультура учителĕн А.Ноздринăн тÿпи уйрăмах пысăк пулнине палăртма питех те кăмăллă.