11 марта 2009 г.
Ырă ĕçсен çулталăкне Кĕлкешри «Ямуков Г.Н.» хресчен (фермер) хуçалăхĕ начар мар кăтартусемпе вĕçлерĕ. Тĕш тырăпа пăрçа йышши культурăсене 560 гектар çинчен кашни гектартан вăтамран 30,3 центнер, çĕр улмие 280 центнер туса илнĕ. Вĕсене сутса самай пысăк тупăш илнĕ.
- ЧР Президенчĕ Н.Федоров кăçалхи çула «Çĕр ĕçченĕн çулталăкĕ» тесе пĕлтерчĕ. Çавна май республикăри аграрисен умне пысăк тĕллев лартрĕ: çĕр улмипе тĕш тырă тухăçне пĕрер миллион тоннăна çитермелле. Агротехника требованийĕсене çирĕп пурнăçласа пырсан, мĕн пур вăй-хала парса ĕçлесен çакна пурнăçлама пулатех, - тет хуçалăх пуçлăхĕ Геннадий Николаевич Ямуков. - 90 гектар çинче кĕр тыррисене агротехникăлла чи лайăх вăхăтра, пысăк пахалăхпа акса хăвартăмăр. Çуркунне акмалли вăрлăхсем пурте кондициллĕ, пысăк тухăç параканнисем. Усă курман çĕр лаптăкĕсене пусă çаврăнăшне кĕртме тăрăшатпăр. Пирĕн таврара усă курман çĕр лаптăкĕсем пачах та ан пулччăр, тетпĕр. Иртнĕ çул хыт-хурапа мăян ăшне путнă 67 гектар çĕре сухаласа акрăмăр пулсан, кăçал тата 180 гектарне ĕçе кĕртме пăхнă. Тыр-пула пухса кĕртмелли техника пирĕн çителĕклĕ. Пĕлтĕр икĕ комбайнпа тухăçлă усă куртăмăр. Иртнĕ кĕркунне вара тепĕр «Нива» комбайн туянтăмăр. Вĕсем çинче ĕçлеме пирĕн механизаторсем çителĕклĕ. Вăрлăха çĕнетсе улăштарасси çине те пысăк тимлĕх уйăратпăр. Хальччен çĕр улмин «Жуковский», «Невский», «Санктпетербургский» сортсене лартса çитĕнтернĕ пулсан, кăçал «Рока», «Ди-скарлет», «Розара» сортсем лартса пăхасшăн. Унсăр пуçне хĕрлĕ кăшман лартатпăр.
Чăннипех те тĕплĕн хатĕрленнĕ Ямуковсем Президентăн тĕллевĕсене пурнăçлас тĕлĕшпе. Çур акине хатĕрленсе минераллă удобренисем, çунтармалли-сĕрмелли матералсем, ÿсен-тăрансене хурт-кăпшанкăсемпе çум курăкран хÿтĕлемелли препаратсем кирлĕ чухлĕ кÿрсе килнĕ.