07 марта 2009 г.
Вăрмарти культурăпа кану центрĕнчи халăх театрне çулталăк ытла кăна ертсе пырать-ха Светлана Павлова режиссер. Апла пулин те ĕçе юратса чунпа пурнăçласа туса пынипе çак кĕске хушăрах коллектив курăнмалла çитĕнÿсем тума пултарчĕ. Акă республикăри ачасемпе çамрăксен театр коллективĕсен «Юмах çăл куçĕ» фестивальте ачасен «Маска» ушкăнĕ «Театра юратнăшăн» номинацире «Золушка» спектакльшăн Диплом илме тивĕç пулчĕ. Режиссера та манса хăварман, вăл та ятарлă Диплома тивĕçнĕ. Çакна каласа хăварар - жюри членĕсене ачасен сцена çинчи костюмĕсем те питĕ илĕртнĕ. Ăста çĕвĕç пулнă май Светлана та вĕсене хитрелетме хăйĕн чунĕн сахал мар пайне хывнă.
Çитĕнÿ тума ĕçченлĕхпе тăрăшулăхсăр пуçне Светлана Николаевнана тарăн пĕлÿллĕ пулни, культура лаççинче чылай çул вăй хуни те пулăшнă паллах. Çĕрпÿри культура училищине пĕтернĕ хыççăн 11 çул ĕнтĕ çак сферăра вăй хурать. Малтанах Анаткас ялĕнчи клуб заведующийĕнче, унтан районти Культура çуртĕнче илемлĕх енĕпе ĕçлекен руководительте тăрăшнă. Вĕренмелли, ăша хывмалли чылай пулнă эппин. Çавăнпа та малалла та çитĕнÿсем (эпир шанасса пысăкраххисем те) пулаççех ĕнтĕ.