25 февраля 2009 г.
Кивĕ Вăрмар ял тăрăхне Вăрмар поселокĕпе юнашар вырнаçнă май, пĕчĕк ялсен нуши пырса тĕкĕнмен. Кунта халăх йышĕ те ÿссех пырать, иртнĕ çул 26 пепке кун çути курнă. Хальхи вăхăтра 613 хуçалăхра 1600 çын пурăнать, вĕсенчен 400-шĕ тивĕçлĕ канурисем. Ялăн инфратытăмĕ куç умĕнчех çĕнелсе улшăнать, çĕнĕ те хăтлă çуртсем çĕкленеççĕ. Юлашки икĕ-виçĕ çулта кăна 10-шар çемье çĕнĕ çуртсене пурăнма куçнă. С.Харитонов предприниматель тăрăшнипе ялти культура çуртне модернизацилеме пуçланă. Сергей Николаевич ялти халăха паха çăкăрпа тивĕçтерме пекарня туса лартрĕ.
Чăваш Республикин Президенчĕн «Чăваш Республикинче ял тăрăхĕсенче çурт-йĕре комплекслă майпа компактлă лартас тата вĕсене тирпей-илем кĕртес енĕпе пилот проектне пурнăçласси çинчен» Указне пурнăçласа çамрăксене çурт-йĕр лартма 56 çемье валли çĕр участокĕсем уйăрса панă. Юлашки çулсенче кăна ялта çĕнĕрен тăватă урам ÿссе ларнă. «Октябре - 50 çул» урама малалла тăснă. «Чиркÿ урамĕ» те пур халĕ ялта. Пекарня туса хута яни вара ял халăхĕн пурнăçне хуларисемпе танлаштарма май панин енĕсенчен пĕри.
- Пекарня тулли хăватпа ĕçлеме тытăнсан кунта 15 çынран кая мар вăй хумалла. Хамăрăн паха продукципе ялти халăха кăна мар, ыттисене те тивĕçтерме пултаратпăр, - тет С.Харитонов предприниматель.
Пекарня валли Чулхуларан çут çанталăк газĕпе ĕçлекен чуста хăпартмалли «Климат-Агро» тата пĕçермелли «Ротор-Агро» кăмакасем илсе килнĕ. Вĕсене унти специалистсем вырнаçтарса панă.
- 150 буханка шурă çăкăр кăмакаран çур сехетре, хури 40-45 минутра пиçсе тухать, - калаçăва малалла тăсать Сергей Николаевич.
Çăкăр пĕçермелли çăнăхпа вĕсене Вăрмарти тырă йышăнакан пункт тивĕçтерет. Ĕçе икĕ сменăпа йĕркеленĕ, пĕрер тонна кăпăшка та тутлă çăкăр пĕçерсе кăларма пултараççĕ. Н.Родзянова технолог, Л.Петрова пекарь, Д.Тимофеевпа Г.Харитонов слесарьсем хăйсен тивĕçне тÿрĕ кăмăлпа пурнăçласа пыраççĕ.