21 февраля 2009 г.
Пĕлтĕр хаçат страницинче Мăнçырмара çуралса ÿснĕ Сергей Юрьевич Ильин Хусанти Çар училищине вĕренсе пĕтерсен мăшăрĕпе Владивосток хулине çар службине тухса кайни çинчен çырнăччĕ. Халĕ акă С.Ильин лейтенант нумай пулмасть отпуска килчĕ. Тинĕс-çар пехотинче службăра тăрать вăл, унăн должноçĕ - взвод командирĕ. Салтаксене парашютпа сикме вĕрентни, хăйсем те сикни пирки каласа парать Сергей. Вертолетсем çинчен сикни шучĕ çуккине пĕлтерет. Нумай çар вĕренĕвĕсене хутшăннă вăл хăйĕн подразделенийĕпе. Калăпăр, уçă тинĕсе карапсемпе тухса БТРсемпе çыран хĕрринче вырнаçнă «тăшмана» атакăласа тĕп тумалла. Тепĕр ротин парашютсемпе асăннă «тăшманăн» позицийĕсем çине анмалла. Çапла пулса иртет çар вĕренĕвĕ. Тăван çĕршыва хÿтĕлеме çапла вĕренеççĕ воинсем. Вĕсемсĕр пуçне кам хÿтĕлетĕр-ха пире?
Сергей хăй тинĕс çар пехотинче службăра пулнишĕн пĕрре те ÿкĕнмест, унти службăн пĕр çулталăкĕ çулталăк çурăпа танлашать. Сергей Юрьевич салтаксене тĕрлĕ хĕç-пăшалпа пеме, алă вĕççĕн кĕрешме, плац çинче стройпа утма тата ыттине те вĕрентет. Çакна та каласа хăварма кăмăллă: С.Ильин ертсе пыракан подразделенире хамăр ял каччи Сергей Алексеевич Васильев хăйĕн çар тивĕçне пурнăçласа пырать, вăл чăваш ятне яманни çинчен хавхаланса каласа парать. С.Ильин пĕрлехи çар вĕренĕвĕсенче ют патшалăх çарĕсемпе, сăмахран китаецсемпе пĕрле пулнине, вĕсемпе тактика заданийĕсене пурнăçланине каласа парать.
Сергейăн мăшăрĕ, Кристина, тыл штабĕнче тăрăшать, унăн ĕçĕ компьютерсемпе çыхăннă. Лейтенант манпа калаçăва вĕçленĕ май тăван çĕршыва юратмаллине, атте-аннене хисеплемеллине аса илтерчĕ, çамрăксен ачаранах çар ретне тăма хатĕрленме кирлине палăртрĕ. Хамăр енчен Сергей Юрьевича службăра ăнăçусем сунас килет, унăн пакунĕсем çинче пысăк çăлтăрсем пулччăр.