18 февраля 2009 г.
Иртнĕ эрнере райадминистрацинче çĕр ĕçченĕсем пухăнса анлă канашлу ирттерчĕç. Унта район пуçлăхĕ В.Кириллов, унăн заместителĕсем, Чăваш Республикинчи ветеринарипе фитосанитари надзорĕн федераллă служба управленийĕн руководителĕн заместителĕ Н.Романов, патшалăх ветеринари надзор пайĕн начальникĕн заместителĕ К.Викторов, ял хуçалăх ĕçченĕсем, Вăрмар хула, ял тăрăхĕсен пуçлăхĕсем, райадминистрацин пайĕсемпе секторĕсен заведующийĕсем килнĕ. Чи малтанах 2008 çулхи районти агропромышленность комплексĕн ĕçĕ-хĕлĕпе район пуçлăхĕн заместителĕ - ял хуçалăхĕпе экологи тата çĕрпе пурлăх пайĕн начальникĕ Л.Петров паллаштарчĕ. Вăл каланинчен иртнĕ çулхи тухăç пур енĕпе те малтанхи çулхисенчен лайăхрах пулни палăрчĕ. Кунта агротехника требованийĕсене çирĕп тытса пыни тата элитлă вăрлăхсемпе усă курни те нумай пулăшни çинчен пĕлтерчĕ.
Çăмăллăхлă кредитпа ку таранччен районта мĕнле усă курни тата малашлăхсем çинчен районта ял хуçалăх производствине патшалăх енчен пулăшу парас енĕпе ĕçлекен специалист-эксперт В.Ефремова паллаштарчĕ.
Çавăн пекех канашлура ветеринарипе санитари требованийĕсене еплерех пурнăçланине тата туса илнĕ ял хуçалăх продукчĕсене вырнаçтарасси пирки, усăсăр выртакан çĕрсемпе тухăçлă усă курмалли, çитсе пыракан Пĕтĕм Раççейри çырав пирки пычĕ калаçу. Ыйтăвĕсем тĕрлĕрен пулчĕç пулин те пурне те кăçалхи тухăç шăпи пăшăрхантарчĕ.