14 февраля 2009 г.
Кăçалхи февралĕн 15-мĕшĕнче Афганистанран пирĕн çарсене илсе тухнăранпа 20 çул çитет. Хĕрлĕçыртан кăна çак çĕршывра интернационалла тивĕçе 10 çамрăк пурнăçланă. Вĕсенчен пĕри - халĕ Шăхальти пĕтĕмĕшле пĕлÿ паракан тĕп шкулти физкультура учителĕ Геннадий Николаевич Васильев. Кĕçĕн сержант служба срокне татса таврăннине паянхи пекех астăватăп.
Салтакран пĕрле илсе килнĕ хăш-пĕр документсемпе паллашма тÿр килнĕччĕ. Акă манăн умра 1988 çулта ноябрь уйăхĕнче илнĕ грамота. Унта çапла çырнă: «Геннадий Николаевич Васильев кĕçĕн сержанта службăри тивĕçĕсене тÿрĕ кăмăлпа пурнăçланăшăн, патшалăх чиккине çирĕп хуралланă вăхăтра сыхă пулнăшăн грамотăпа наградăлас».
- Чикке çирĕп хураллаттăмăр. Афганистанăн тĕрлĕ хулисене душмансем тапăнасран хÿтĕлеме тиветчĕ. Хайратон хули çывăхĕнче те лару-тăру лăпкă марччĕ. Душмансем час-часах персе тăни канăç памастчĕ, çапăçăва кĕме лекетчĕ, - аса илет вăл.
Афганистан Республикин Оборона министерстви панă Тав грамоти те Васильев хăюллă салтак пулнине çирĕплетет.
Çар округĕнчен воин-патриот, интернационалист ячĕпе янă саламлă çырура çапла каланă:
«Кĕтнĕ вăхăт çитрĕ, эсĕ тăван çĕр çине кĕретĕн. Тăван çĕршыв хăйĕн ывăлĕсемпе тивĕçлипе мухтанать. Йывăр самантсенче эсир совет çыннин паха енĕсене кăтартса патăр».
Афганистан Республикине интернационалла пулăшу парас енĕпе çарти тивĕçе пысăк ăсталăхпа туса пынăшăн Васильев кĕçĕн сержант ятне çырнă алла çыхмалли сехет парса чыс тунă.
- Халĕ эпир килте мирлĕ ĕçре. Апла пулин те чĕрере йывăр. Афганистан Республикин ирĕклĕхне сыхласа хăварассишĕн паттăррăн çапăçса пуç хунă юлташсем асран тухмаççĕ. Вунсакăр-çирĕм çулхи каччăсен пурăнмалла та пурăнмаллаччĕ, хĕрсене юратмаллаччĕ, çемье çавăрса ача-пăча çитĕнтермеллеччĕ. Çавăн пек çамрăксене çухатма питех те йывăр, - каласа парать вăл.
Генăн пиччĕшĕ - Валерий те службăра Афганистанра пулнă, интернационалла тивĕçе чыслăн пурнăçласа таврăннă, халĕ тăван ялта ĕçлесе пурăнать.
Вĕсен амăшĕ - Таисия Ивановна чылай вăхăт хушши ялти сысна ферминче тăрăшулăх кăтартрĕ, ăмăртура малтисен ретĕнче пычĕ, тивĕçлĕ канăва та унтанах тухрĕ.
Г.Васильев афганец шкулта физкультурăпа спорта аталантарас енĕпе хăйĕн мĕн пур пĕлĕвне, тăрăшулăхне парать. Канашри педучилищăн физкультура уйрăмне вĕренсе пĕтернĕскер, пултаруллă спортсменсем врентсе хатĕрлесси çине пысăк тимлĕх уйăрать. Шкулта вĕренекенсем хушшинче тăтăшах ăмăртусем йĕркелет, вăйлисене тупса палăртать, вĕсен ăсталăхне ÿстерсех пырать. Г.Павлов, Д.Разумов, Д.Максимов вĕренекенсем районта тата республикăра ирттерекен ăмăртусенче лайăх результатсем кăтартаççĕ. Вĕренÿ çулĕнче хăйсен ентешне, Шăхальте çуралса ÿснĕ çăмăл атлета, тĕнче класлă спорт мастерне, Пĕтĕм тĕнчери Универсиада чемпионне, СССР рекордсменне, XX Олимп вăййисен участникне Н.Пуклакова халалласа ăмăртусем йĕркелесси çирĕп йăлана кĕнĕ. Интернационалла тивĕçе пурнăçласа Афганистанра пуçне хунă Шăхаль каччине Юрий Иванова асăнса шкулта çулсеренех волейболла выляса районта мала тухассишĕн ăмăртусем йĕркелеççĕ. Шăхале ытти шкулсенчен те командăсем пуçтарăнаççĕ. Çак кун чăн-чăн спорт уявĕ шутланать.