11 февраля 2009 г.
Кавал ялĕ мĕн авалтанпах чапа тухнă спортсменсемпе пуян. Кавалсем спортăн пур енĕпе те палăрнă тесен те йăнăш пулас çук. Вĕсен хушшинче ирĕклĕ майпа кĕрешекенсем те йышлă. Ялти культура çурчĕ çумĕнче йĕркеленĕ спорт секцине яшсемпе хĕрсем кăмăлласа çÿреççĕ. Тăххăрмĕш класра вĕренекен Саша Александров кĕрешме вĕренекенсен секцине виçĕмçулах çырăннă. Р.Таратин тренер тăрăшнипе хăйĕн спортри пултарулăхне ÿстерсех, ăсталăхне туптасах пырать, кĕрешÿ мелĕсене, вăрттăнлăхĕсене тĕплĕн вĕренет. Тăрăшни сая каймасть. Çав çулах вăл пысăк çитĕнÿ тăвать. Март уйăхĕнче 1993-1994 çулсенче çуралнă çамрăксем хушшинче ирĕклĕ майпа кĕрешсе «Костро» тулли мар яваплă обществăн призĕсене çĕнсе илессишĕн Шупашкарта ирттернĕ республикăри турнирта иккĕмĕш вырăн йышăнать.
2007 çулта ирĕклĕ майпа кĕрешсе пĕр тăван Таратинсен призĕсене çĕнсе илессишĕн районти Спорт çуртĕнче ирттернĕ республикăри уçă турнирта 62 килограмм таран таякан çамрăксем хушшинче А.Александров чемпион ятне тивĕçнĕ.
Иртнĕ çулхи кăтартусем те курăмлă. 1993-1994 çулсенче çуралнă арçын ачасем хушшинче республикăра мала тухассишĕн Канаш районĕнчи Вырăскас Пикшихра ирттернĕ тупăшура виççĕмĕш вырăна тухнă.
ЧР физкультурăпа спортăн тава тивĕçлĕ ĕçченне В.Н.Григорьева халалласа Шупашкар районĕнчи Тутаркассинче ирттернĕ республикăри саккăрмĕш турнирта иккĕмĕш пулнă.
Пĕлтĕр пĕр тăван Таратинсен призĕсене çĕнсе илессишĕн ирттернĕ республикăри уçă турнирта та Александровăн иккĕмĕш вырăнпа килĕшмелле пулнă.
Ирĕклĕ майпа кĕрешсе ЧР физкультурăпа спортăн тава тивĕçлĕ ĕçченне тата ЧР тава тивĕçлĕ тренерне Г.Н.Смирнова асăнса Шăхасанта ирттернĕ йăлана кĕнĕ республикăри уçă турнирта 69 килограмм таран таякан спортсменсем хушшинче пирĕн ентеш чемпион ятне çĕнсе илнĕ, хисеп пьедесталĕн чи çÿллĕ картлашки çине хăпарма тивĕç пулнă.
Чăннипех те пултарать Саша. Çамрăк-ха вăл, унăн малашлăхĕ пысăк. Пĕрре кăна мар савăнтарĕ вăл пире хăйĕн çитĕнĕвĕсемпе. Эпир вара ăна ăнăçу сунатпăр.