07 февраля 2009 г.
Пирĕн Мăнçырмари икĕ касра та 90 çултан ирт нисене шутлама пĕр алăри пÿрнесем те çитеççĕ. Вĕсенчен пĕри - Ольга Ивановна Русскова. Вăл 92 çултан каçнă ватă кинеми.
О.Русскова хамăр ялти Лешкас урамĕнче çуралса ÿснĕ. Шкулта 4 класс пĕтерсен малашнехи пурнăçĕ унăн «Правда» колхозпа çыхăнать. Çамрăкрах чухне уй-хир бригадинче ĕçлет, çĕр улми анисене çум курăкран тасатнă çĕрте тăрăшать. Улькка аппа ĕçленĕ вăхăтра комбайн, молотилка таврашĕ пулман, çавăнпа та пур ĕçе те алă вĕççĕн пурнăçланă. Тырра çурлапа вырса кĕлте çыхнă, кайран вĕсене капана хывнă. Çак ĕçе Улькка аппа та хутшăннă. Кĕркунне тырра тăпачăпа çапнă, улăмне урасем тунă, фермăсене турттарнă. Хăмла туса илес енĕпе те тăрăшнă Ольга Ивановна. Хăмла плантацийĕнче юпасем валли миçе шăтăк чавман-ши вăл, кĕркунне хăмлине татма та кайнă. Çуркунне çĕр улми лартма вăхăт çитсен касма та, лартма та çÿренĕ. Фермăна сурăх çăм илме те кайнă. Ольга Ивановна Мăнçырма каччипе Федор Николаевич Николаевпа çемье çавăрнă, вăл 1908 çулта çуралнă. Салтакран кăкăр тулли орден-медальсемпе таврăннă. Тĕрлĕ вырăнсенче ĕçленĕ, юлашки çулсенче мĕн пенсие тухичченех Вăрмарти «Сельхозснаб» организацийĕнче директор пулса вăй хунă. Вĕсем çичĕ ача пăхса ÿстернĕ, çавăнпа та Улькка аппа 50 çулта тивĕçлĕ канăва тухнă. Пенсие тухсан та вăй çитнĕ таран колхоза пулăшнă. Ĕçне кура - хисепĕ. Ăна «Ĕç ветеранĕ» ят парса чыс тунă. Аслă Отечественнăй вăрçăра çĕнтернĕ ятпа юбилей медалĕсене тивĕçнĕ, Хисеп грамотисем те темĕн чухлех унăн.
Палăртма кăмăллă, Ольга Ивановнапа Федор Николаевичăн ывăл ачисем, мăнукĕсем спортпа питĕ туслă, уйрăмах кĕрешес енĕпе. Илер-ха Виталийпе Олег Федоровичсене. Вĕсем районта ирттерекен акатуй уявĕсенче темиçе хутчен те сумлă парнесем çĕнсе илнĕ. Олег каласа панă тăрăх, вăл 5-мĕш класра вĕреннĕ чухнех Кавалти ярмăрккăра лашапа чуптарса пĕрремĕш вырăн йышăннă. Олег Федорович малтан автотранспорт предприятийĕнче водитель пулса 10 çул ĕçлерĕ, халĕ «Урмарская» коллективлă строительство организацийĕ» акционерсен хупă обществинче вăй хурать. Мăшăрĕ, Альбина Александровна, 18 çул Вăрмар тата Куславкка çар ĕç комиссариатĕнче тăрăшать. Улькка аппан мăнукĕсем те сумлă вырăнсенче ĕçлеççĕ, вĕсем те районта ирттерекен акатуйсенче кĕрешес енĕпе малти вырăнсене çĕнсе илеççĕ. Унсăр пуçне кÿршĕри Тутар Республикинче те спорт енĕпе пысăк çитĕнÿсем тăваççĕ.