07 февраля 2009 г.
Район хаçачĕн редакцийĕнче иртнĕ тÿрĕ линие «Урмарытеплосеть» муниципаллă унитарлă предприятийĕн начальникĕ Юрий Ефимович Никитин хутшăннă. Кун йĕркинче: «2008 -2009 çулхи хутса ăшăтмалли сезонра тухса тăнă йывăрлăхсем тата вĕсене татса парасси». Çавна май районта пурăнакансенчен чылайăшне коммуналлă хуçалăхпа çыхăннă хăш-пĕр ыйтусем хумхантарчĕç. Редакцие шăнкăрав хыççăн шăнкăрав килсе тăчĕ. Шăнкăравлакансем хăйсен ыйтăвĕсем çине туллинрех хурав парасса кĕтрĕç. Хăшĕ-пĕрисем вара редакцине килсе куçа-куçăн курса калаçас терĕç. Хисеплĕ вулаканăм, тÿрĕ линире граждансем панă ыйтусен хуравĕсемпе паллашма сĕнетпĕр.
Чи пĕрремĕш шăнкăрав Вăрмар поселокĕнчи Заводская урамри 41-мĕш çуртра пурăнаканран пулчĕ. Вăл канализаци каяшĕ путвала кĕрсе тулни пирки пăшăрханса пĕлтерет. Кăçалхи çул хваттерте ăшă нормăпа палăртнă шайра пулнине палăртать.
Ю.НИКИТИН: ку ыйтăва «Коммунальник» муниципаллă унитарлă предприяти татса парать. Хамăн енчен çакна калам: канализаци системи йĕркеллĕ ĕçлеменни ятарласа чавнă тарасана каяш тулса ларнипе çыхăнма пултарнă. Ăна вăхăтра тасатса тăрсан кун пек пăтăрмах пулмалла мар.
Ленин урамĕнчи 51-мĕш çуртра пурăнакан Н.Михайлов ăшă паракан система кивелсе пыни, çавна май шăтса пĕтни çинчен каларĕ. Хваттерти пÿлĕмсене ăшă пĕр пек пыманнине пула ăшă пыракан пăрăхсен вăрăмăшне тăсма май килмест-ши тесе кăсăкланчĕ.
Ю.НИКИТИН: ăшă паракан система çултан-çул кивелсе пырать. Ăна улăштармалла паллах. Анчах çак ĕçсене пурнăçлама хальхи вăхăтра укçа-тенкĕ çитсе пыманни пысăк чăрмав кÿрет. Çитес вăхăтра пирĕн района коммуналлă хуçалăха аталантарма республика бюджетĕнчен укçа-тенкĕ уйăрма палăртнă. Çав укçа-тенкĕпе эпир кивелсе çитнĕ ăшă пыракан пăрăхсене улăштарма, юхăннă çурт-йĕре юсама тата ытти чылай ĕçсене тума палăртатпăр.
Çак урамра пурăнакансенченех тепĕр ыйту пулчĕ. Мĕншĕн коммуналлă пулăшушăн çулталăкĕпех тÿлемелле? Хутса ăшăтмалли сезон 7 уйăх кăна пырать-çке?
Ю.НИКИТИН: хваттер хуçисем коммуналлă пулăшушăн кашни уйăхра тÿлесе пыраççĕ. Енчен те хутса ăшăтмалли сезонта кăна тÿлес пулсан унăн уйăхра тÿлемелли нормативĕ улшăнать. Тепĕр майлă каласан чылай пысăкрах пулать. Кун пек чухне пурте тÿлеймесен те пултарĕç. Коммуналлă пулăшушăн укçа-тенкĕ тÿлеме чăрмавсем ан пулччăр тесен çулталăк тăршшĕпех тÿлеме палăртнă.
Ленин урамĕнчи 41 çуртра пурăнакансем çуртăн çивитти юрăхсăра тухни пирки пăшăрханса пĕлтереççĕ.
Ю.НИКИТИН: çурт-йĕрсене юсассипе «Пурăнмалли çурт-йĕрпе коммуналлă хуçалăха ертсе пыракан компани» тулли мар яваплă общество ĕçлет.
Çÿлерех асăннă компани пуçлăхĕ О.Викторов пĕлтернĕ тăрăх, «Вăрмар район территорийĕнче 2009 çулта нумай хваттерлĕ çуртсене капиталлă юсав ĕçĕсем тăвасси» программăпа килĕшÿллĕн поселокри Ленин тата ытти урамсенчи юхăнса тăракан çурт-йĕре юсама палăртнă.
«Пирĕн çуртра пурăнма нимĕнле услови çук. Çуртăн çивитти кивелсех çитнĕ, çумăрлă çанталăкра хваттерсене шыв каять. Паянхи кунччен те шыв кĕртмен. Туалет урамра. Вăл та пĕтĕмпех юхăнса пĕтнĕ, каяшпа тулса ларнă. Ăна тасатакан никам та çук. Туалечĕ те ишĕлсе анас патнех çитнĕ», - теççĕ Ленин урамĕнчи 51-мĕш çуртра пурăнакансем.
Ю.НИКИТИН: «Пурăнмалли çурт-йĕрпе коммуналлă хуçалăха ертсе пыракан компани» тулли мар яваплă общество çак ыйтусемпе ĕçлет.
Çавна май ун пуçлăхĕпе О.Викторовпа çыхăнтăмăр. Вăл çапла хуравларĕ: «Ленин урамĕнчи туалетсем чăнах та юрăхсăра тухнă. Кăçал эпир вĕсене çĕнĕрен тума планлатпăр. Унпа пĕрлех çурт çивиттине те укçа-тенкĕ çитнĕ таран улăштарма пăхнă».
Пĕтĕмĕшле каласан, икĕ сехет пынă тÿрĕ линире ыйтусем чылай пулчĕç. Палăртма кăмăллă, шăнкăравлакансенчен чылайăшĕ хваттерсенче ăшă çителĕклĕ пулни çинчен пĕлтерчĕ, Ю.Никитин пуçлăха тав сăмахĕсем каларĕç.
Умра - Республика кунĕ. Апла пулсан коммуналлă хуçалăх ĕçченĕсен çитменлĕхсене май пур таран пĕтермелле. Поселокра, ял тăрăхĕсенче пурăнакансен те алă усса ларас пулмасть. Хăйсем пурăнакан вырăна тирпей-илем, хăтлăх кĕртме тăрăшмалла. Пĕрле алла-аллăн тытăнса ĕçлесен ÿсĕм пулатех.