28 января 2009 г.
Шупашкарта Пичет Çуртĕнче Раççей тата Чăваш пичечĕн кунĕсене халалласа ирттернĕ уява Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Р.Лизакова, Чăваш Республикин Шалти ĕçсен министрĕ В.Антонов, ЧР Патшалăх Канашĕн председателĕн заместителĕ В.Мидуков, ЧР Журналисчĕсен союзĕн председателĕ В.Комиссаров хутшăнчĕç.
Уява ЧР Журналистсен союзĕн председателĕ В.Комиссаров уçрĕ, РФ Журналисчĕсен союзĕн председателĕн В.Богдановăн, РФ Патшалăх Думин депутачĕн, летчик-космонавтăн Н.Бударинăн саламлă çырăвĕсене вуласа пачĕ. В.Комиссаров «Хыпар» никĕсĕ çинче туса хунă Чăваш пичечĕн кунне вуннăмĕш хут паллă тунине палăртрĕ. ЧР культура, национальноçсен ĕçĕсен, информаци политикин тата архив ĕçĕн министрĕ Р. Лизакова пичет ĕçĕ яваплă та пысăк, çав вăхăтрах пархатарлă ĕç пулнине, журналистсем республика пурнăçне, унăн социаллă-экономикăллă аталанăвне анлăн çутатнине палăртрĕ. «Паян Чăваш Енре 400 яхăн массăллă информаци хатĕрĕ ĕçлет. Интернет анлăшĕ вăй илсе пырать. «Президент библиотеки» ярăмри кĕнекесем тухаççĕ», - терĕ Р.Лизакова министр. ЧР Патшалăх Канашĕн председателĕн заместителĕ В.Мидуков пичет ĕçченĕсене саламларĕ, журналистсене вĕсен çăмăл мар ĕçĕнче ăнăçусем сунчĕ. ЧР Шалти ĕçсен министрĕ В.Антонов массăллă информаци хатĕрĕсен ĕçченĕсем историне çырса кăтартма çеç мар, ăна тума та хастар хутшăнни çинче чарăнса тăчĕ. Çавăн пекех «Хыпар» хаçат тĕп редакторĕ А.Леонтьев республикăра, ун тулашĕнче те чăваш пичечĕн пĕлтерĕшĕ пысăк пулнине çирĕплетрĕ. Массăллă информаци хатĕрĕсенче палăрнă пултаруллă журналистсене наградăсемпе парнесем пачĕç. Çемен Элкер премийĕн лауреачĕн ятне С.Игнатьев фотокорреспондент, М.Карягина тележурналистка тивĕçрĕç. Н.Никольский премие И.Тенюшева, Л.Ильин ячĕллĕ премие Сĕнтĕрвăрри райхаçачĕн корреспондентне И.Никитинана пачĕç. Тĕрлĕ конкурссенче пирĕн районта тухса тăракан «Хĕрлĕ ялав» хаçат ĕçченĕсем те палăрчĕç.