28 января 2009 г.
«Ырă ĕç тăвакан çын нихăçан та ывăнмасть» тесе каланă ваттисен сăмахĕ Атнаш ялĕнче пурăнакан Михаил Васильевич Васильев пирки каланăнах туйăнать. Ара, вăл халăхшăн ырă ĕç тăвать-çке. Почтальонра ĕçленĕ май, кашни кун тенĕ пекех тăватă çухрăмра вырнаçнă Аслă Чакри çыхăну уйрăмне хутлать. Кăçалхи март уйăхĕнче Атнашпа Аслă Чак ялĕсем хушшинчи çула такăрлатма пуçланăранпа 16 çул çитет.
- Михаил Васильевич пирки пĕр пăсăк сăмах та калама çук. Хăйĕн тивĕçĕсене тÿрĕ кăмăлпа пурнăçласа пырать, почтальон ĕçне юратать. Çавăншăн ăна коллектив та, ял-йыш та хисеплет. Атнашра пурăнакансенчен кашни икĕ килтен пĕринче районта тухса тăракан «Хĕрлĕ ялав» хаçата илсе тăраççĕ, - тулли кăмăлпа каласа парать çыхăну уйрăмĕн начальникĕ Надежда Андреевна Никитина.
Аслă Чак ял тăрăхĕн территорийĕнче чи сумлă çынсенчен пĕри вăл. Ахальтен мар ĕнтĕ иртнĕ суйлавра М.Васильева ял тăрăхĕн депутачĕсен Пухăвĕн депутатне суйласа пысăк чыс тунă. Суйлавçăсем панă наказсене пурнăçа кĕртессишĕн хăйĕн мĕн пур тăрăшулăхне парать. Унăн ĕç-хĕлĕпе ял тăрăхĕн пуçлăхĕ М.Ухин та кăмăллă.
- Ял тăрăхĕн социаллă ыйтусемпе, тирпей-илем кĕртес, транспорт тата çыхăну енĕпе ĕçлекен яланхи комисси составне кĕртнĕ Михаил Васильевича. Кунта та вăл пуçарулăх кăтартать. Хăйсен Атнаш ялĕнчи шыв ăсмалли тарасасене йĕркеллĕ тытса тăрас енĕпе чылай пулăшать, - хăйĕн шухăшне пĕлтерет ял тăрăхĕн пуçлăхĕ Михаил Петрович.
Çамрăклăхĕ унăн ытти яшсенчен нимĕнпех те уйрăлса тăман. Аслă Чакри сакăр çул вĕренмелли шкултан вĕренсе тухнă хыççăн, специальность илес тесе, Канаш хулинчи профтехучилищĕне вĕренме кĕрет. Икĕ çул пĕлÿ илнĕ хыççăн электрогазосварщик специальноçне алла илет. Ун хыççăн ăна ĕçлеме направленипе Владимир облаçне яраççĕ. Ватă ашшĕ ялта пĕччен пурăннă пирки (амăшĕ вăхăтсăр çĕре кĕрет) тăван киле таврăнма лекет. Анчах та нумайлăха мар. Каллех Саратов облаçне тăван аппăшĕ патне тухса каять. Пĕр çулталăк ĕçленĕ хыççăн каялла таврăнать. Пĕр вăхăт Вăрмарти сĕтел-пукан фабрикинче ĕçлет. Унтан аш-какай комбинатне куçать. Çамрăк каччăна кунтанах савăнăçлă лару-тăрура Совет Çарне ăсатса яраççĕ. Службăна Саратов облаçĕнчи Энгельс хулине лекет. Икĕ çул сисĕнмесĕрех иртсе каять. Салтакра пулнă вăхăтра та хăйĕн специальноçĕпе ĕçлеме тÿр килет ăна. Салтакран 5-мĕш разрядлă специалист пулса таврăнать.
Çартан çирĕпленсе таврăннă каччăна колхоз руководителĕсем часах асăрхаççĕ. Колхоз председателĕ С.Галкин ăна газоэлектросварщикра ĕçлеме сĕнет. Салтак тумне тин кăна хывма ĕлкĕрнĕскер хаваспах килĕшет. Ĕне, сысна, пăру витисенчи шыв, сĕт пымалли тата витесене хутса ăшăтмалли пăрăхсене йĕркеллĕ ĕçлеттерсе тăрать. Чирленипе кăна 1984 çулта колхозра ĕçлеме пăрахать.
1993 çулта хăйĕн пурнăçне почтăпа çыхăнтарать. Мĕн паян кунчченех унта вăй хурать. Çак кунсенче вăл хăйĕн 60 çулхи юбилейне паллă турĕ. Чаплă юбилейпе ăна Аслă Чак ял тăрăхĕн тата районти почтамт администрацийĕсем районти пĕртен-пĕр пултаруллă арçын почтальона Михаил Васильевич Васильева ăшшăн саламларĕç, пархатарлă ĕçшĕн Тав çырăвĕсем пачĕç, хаклă парнесем парса хавхалантарчĕç, малашнехи ĕçре ăнăçусем сунчĕç. Хаçат редакцийĕ те ăна район хаçатне кашни киле çитерес енĕпе ырă сунать.