21 января 2009 г.
Иртнĕ çул Пысăк Енккассинче вăтам шкулăн çĕнĕ çуртне хута яни вĕрентекенсемшĕн кăна мар, вĕренекенсемшĕн те пысăк савăнăç пулчĕ. Кадетсен класне уçни вара - çĕнĕлĕх. Саккăрмĕш класра пурĕ 18 ача.
Ку класăн учредителĕ - район администрацийĕ, социаллă партнерĕ тата шефĕ - Хусанти танк училищи. Вĕренÿ программи кăткăс. Ачасен ăс-хакăлне çирĕплетмелле, вĕсене Тăван çĕршыва, ĕçе, аслă ăрури çынсене хисеплеме вĕрентмелле. Физкультурăпа спорт, çарпа патриотизм, нравственность вĕренекенсен тата ытти паха енĕсем тĕп вырăнта тăраççĕ. Пĕлтĕр вĕсем Канаш хулинче призыв çулне çитмен çамрăксен Спартакиадинче лайăх результат кăтартнă. Икĕ куна пынă ăмăртусенче каччăсем граната ывăтнă, эстафетăра ăмăртнă.
Çак кунсенче кадетсем присяга тытрĕç. Ку пысăк пĕлтерĕшлĕ мероприятие район руководителĕсем, вĕренекенсен ашшĕ-амăшĕсем хутшăнчĕç.
Савăнăçлă линейкăна шкул директорĕ Г.Архипова уçрĕ.
Кадетсене вĕренÿре ăнăçусем сунса район пуçлăхĕн социаллă ыйтусемпе ĕçлекен заместителĕ - райадминистрацин вĕрентÿ тата çамрăксен политикин пайĕн начальникĕ Ю.Соколов, Вăрмар тата Куславкка районĕсенчи çар ĕç комиссарĕн заместителĕ С.Алексеев, Аслă Чак ял тăрăхĕн пуçлăхĕ М.Ухин, вĕренекенсен ашшĕ-амăшĕсен ячĕпе В.Сидоров тухса калаçрĕç, присяга тытнă ятпа вĕсене саламларĕç.