01 января 2009 г.
Эпир, райпон «Вăрмарти çăкăр завочĕ» тулли мар яваплă обществăра тăрăшса вăй хуракансем, иртнĕ çула начар мар кăтартусемпе вĕçлерĕмĕр. Çапла çирĕплетсе калама сăлтав çителĕклĕ. Çулран-çул суту-илÿпе паха продукци туса кăларассине анлăлатса, производство хăватне ÿстерсе пыратпăр. Иртнĕ çулхи кăтартусем те курăмлă. 2008 çулхи 11 уйăхра туса кăларнă продукци калăпăшĕ 12 миллион та 161 пин тенкĕпе танлашнă. Ку унчченхи çулхипе танлаштарсан ытларах.
Паллах, хăй тĕллĕн нимĕн те пулмасть: палăртнă тĕллевсене пурнăçа кĕртме сахал мар вăй хумалла. Пирĕн обществăн туслă коллективĕ йывăрлăхсемпе ăнăçлă кĕрешет, çитĕнÿ патне ăнтăлать. Хальхи вăхăтра предприятире 45 çын вăй хурать. Уйăхне 50-60 тонна паха çăкăр пĕçеретпĕр. Предприяти çулсерен çăкăр, çăкăрпа булка изделийĕсем - 50, кондитер изделийĕсем 30 тĕрлĕ ытла хатĕрлет. Эпир кăларакан шерпетпе кекса, рулетпа мармелада, шушкăпа сухарие, пĕремĕке, ытти кондитер изделийĕсене районта кăна мар, пысăк хуласемпе республика тулашĕнче пурăнакансем те хаваспах туянаççĕ.
Хамăр туса кăларакан паха çăкăрпа иртнĕ çул вĕçĕнче Куславкка районне те тивĕçтерме тытăнтăмăр. Кÿршĕсем ытларах «Дарнинский», «Цивильный», «Пшеничный» йышши çăкăрсене кăмăллаççĕ.
Çулсеренех пурлăхпа техника базине те вăйлатса пыма тăрăшатпăр. Иртнĕ çулсенче акă çăкăр пĕçерме Ротор-АГРО 2 кăмака, ытти оборудовани 2 миллион тенкĕлĕх кредит шучĕпе туяннă. Ку енĕпе пире район администрацийĕ пысăк пулăшу кÿчĕ. Кун пек оборудовани туянни ĕç процесне чылай çăмăллатрĕ, унпа пĕрлех çăкăр пахалăхĕ те ÿсрĕ. Тутлă та техĕмлĕ çăкăрпа кашни ир райпон лавккисене, уйрăм çын предпринимательсен лавккисене тивĕçтеретпĕр. Акă Чупайĕнчи Ю.Викторов, Тикашри М.Кондакова, Кĕтеснерти Т.Сотникова, Чулкасри С.Михайлов, Çĕнĕ Кавалти Е.Григорьев, поселокри А.Жук предпринимательсемпе тачă çыхăну тытатпăр. Вĕсем эпир туса кăларнă продукцине кăмăллаççĕ, сутаççĕ. Çак пултаруллă предпринимательсемпе пĕрлех эпир ытти предприятисемпе организацисенче, социаллă сферăра тăрăшакансене тачă çыхăну тытма ыйтатпăр. Иртнĕ çул цехсенче те капиталлă юсав ĕçĕсем 100 пин тенкĕлĕх пурнăçларăмăр. Кăçал та ĕмĕт-тĕллевсем пысăк. Ялсене çăкăр турттарма Газель автомашина, печени, пĕремĕк кăларма çĕнĕ оборудовани, кондитер изделийĕсем туса кăларма кăмака туянасшăн. Çулсеренех республикăра Чăвашпотребсоюз ирттерекен конкурссене активлă хутшăнатпăр. Акă иртнĕ çулхи октябрь уйăхĕнче Муркаш районĕнчи Мăн Сĕнтĕрте иртнĕ конкурсра кондитер изделисемпе пĕрремĕш вырăна тухрăмăр. Йĕпреçре иртнĕ конкурсра эпир сийлĕ кондитер изделисем туса кăларассипе те пĕрремĕш вырăн йышăнтăмăр.
Ĕçне кура - хисепĕ. Производство енĕпе ĕçлекен А.Яковлева начальник, А.Михайлова технолог, Н.Матвеева, Н.Ефремова, Н.Григорьева, Т.Мартьянова, Н.Иванова, О.Кудряшова, Е.Кохнурова çăкăр пĕçерекенсем, Н.Родзянова эксперт хăйсен ĕçĕнче чăн-чăн ăстасем. Л.Петрова тĕп бухгалтер та хăйĕн ĕçне пысăк пахалăхпа пурнăçласа пырать. Коллектива çĕнĕ çулта çитĕнÿ тума çирĕп сывлăх, иксĕлми вăй-хал сунатăп. Районта пурăнакансен вара уяв кĕреки райпон Вăрмарти çăкăр завочĕн апат-çимĕçĕпе тулăх пултăр.