26 декабря 2008 г.
Çырас ĕç - Турă панă пултарулăх. Ăна ниçта та вĕрентмеççĕ. Çапла каланă та, писатель-поэта хатĕрлес ĕçе хăй еккипе чуптарнă, «талантсене пулăшмалла, талантсăррисем хăйсемех ишсе тухĕç» тени те манăçнă. Паян акă ахрат çырми çыранне çитсе те тăтăмăр. Çамрăксен хушшинче çыракан çукпа пĕрех. ЧР писательсен союзĕсенче те ытларах пенси çулĕсенчисем. Çавăнпа та декабрĕн 12-мĕшĕнче Çамрăк писательсен форумне ирттермен- тĕк - ыран кая юлма пултараттăмăрччĕ. Аслă çулсенчи çыравçăсемпе çамрăксем, влаç тытăмĕсенче ĕçлекенсем, издательсем Оперăпа балет театрĕнче тĕл пулса çамрăк çыравçăсен ыйтăвĕсене сÿтсе яврĕç.
Тĕл пулăва ЧР писателĕсен пĕрлĕхĕ тата Республикăри профессиллĕ писательсен Союзĕ йĕркеленĕ. Форумри тĕп ыйту: çамрăк писательсем - камсем вĕсем? Вĕсен пултарулăхĕ халăх патне çиттĕр тесен мĕн тумалла? Çакă тата ытти ыйтусем çине хурав тупма тăрăшрĕç форума пуçтарăннисем. Тĕп ыйтăвăн хуравĕн тупсăмне ЧР культура министрĕ Р.Лизакова çапла палăртрĕ - çамрăксене вăхăтра алă памалла, тĕрĕс çул кăтартмалла. Министр тухса калаçнине М.Юхма, «Хресчен сасси» издательство çурчĕн директорĕ - тĕп редакторĕ С.Павлов тата ыттисем те ырласа йышăнчĕç. Кам-ха вăл çĕнĕ çыравçăсен çĕнĕ геройĕ; Форумра çак ыйтăва та çирĕплетрĕç. Профессиллĕ писательсен Союзĕн правленийĕн председателĕ И.Вутлан çак ыйту çине çамрăк авторсем хăйсем хурав пама пултараççĕ терĕ. Çамрăк çыравçăсем умĕнче тухса тăракан тĕрлĕ ыйтусем тавра форума хутшăннисенчен чылайăшĕ тухса калаçрĕ.
Чăваш Республикин культура, национальноçсен ĕçĕсен, информаци политикипе архив ĕçĕн министрĕ Р.Лизакова Чăваш Енĕн наци радиовĕнче литература передачисем йĕркелессине тĕл пулăва хутшăннисем хапăл туса йышăнчĕç.