17 декабря 2008 г.
Çак çитĕнÿре хуçалăхри кашни ĕçченĕн тÿпи пур. А.Ульяновпа В.Григорьев тата Н.Долговпа Н.Матвеев комбайнерсем «хир карапĕсене» уйрăмах тухăçлă ĕçлеттерчĕç. О.Александров, С.Петров, М.Тапинов, Ю.Александров, Н.Тапинов водительсем уйран тырă турттарнă çĕрте тăрăшуллă пулчĕç. Кĕр тыррисем акма çĕр хатĕрлес енĕпе Ю.Иваншкинпа Г.Николаев механизаторсем ырă тĕслĕх кăтартрĕç. Мĕн пур лаптăка пĕтĕмпех сухаласа хăварнă. Кĕр тыррисене 450 гектар акнă.
ЧР Президенчĕ Н.Федоров 2009 çула Çĕр ĕçченĕн çулталăкĕ тесе пĕлтерчĕ. Апла пулсан пирĕн тунă ÿсĕмсемпе лăпланса лармалла мар, татах та тăрăшарах ĕçлемелле. Наука çитĕнĕвĕсемпе малта пыракансен опытне ĕçе кĕртсе пымалла, çĕр ĕç культурине, унăн пулăхне ÿстермелле, пысăк тухăçлă элитлă вăрлăхсемпе акса-лартса хăвармалла. Çавăнпа халĕ паха вăрлăх хатĕрлесси çине уйрăмах тимлĕ пăхатпăр. Ку енĕпе ятарласа звено йĕркеленĕ. Нинăпа Николай Сормулатовсем, Н.Иванов, Т.Туйми, Н.Софронов, Н.Чернов, С.Митрофанов, С.Чернова, Ю.Данилов рабочисем вăрлăх хатĕрленĕ çĕрте сортировкăна тухăçлă ĕçлеттереççĕ. Вĕсем ĕçне складсен заведующийĕ Н.Иванова йĕркелесе пырать. 1000 центнер тулă вăрлăхне сортласа пĕтерчĕç те ĕнтĕ. Халĕ урпа вăрлăхне аллаççĕ. Курăк вăрлăхĕпе те ĕçлемеллисем пур-ха.
Çитес çур акинче тĕш тырăпа пăрçа йышши культурăсене пурĕ 1000 гектар çине акса хăвармалла. Курăксен лаптăкĕ 750 гектар йышăнмалла.
Çур акине кĕске вăхăтра тата пысăк пахалăхпа ирттерме халех хатĕрленме пуçларăмăр.