17 декабря 2008 г.
Шăхаль ял тăрăхĕнче пурĕ 499 хуçалăх, вĕсенче 998 çын пурăнать. Ял тăрăхĕнче «Шигали» хуçалăх вырнаçнă, пĕтĕмĕшле пĕлÿ паракан тĕп шкул, çыхăну уйрăмĕ, фельдшерпа акушер пункчĕ, клуб, библиотека, çынсен ыйтăвĕсене тивĕçтерме 4 суту-илÿ точки пур. 225 кил хуçалăхĕнче çут çанталăк ырлăхĕпе усă кураççĕ.
Ял тăрăхĕнчи 10 депутат хăйсен тивĕçĕсене тÿрĕ кăмăлпа пурнăçлассишĕн, суйлавçăсем панă наказсене ĕçе кĕртессишĕн хăйсен мĕн пур тăрăшулăхне, вăй-халне параççĕ. Ку енĕпе Ю.Тапинова, О.Быстрова, Н.Скворцова, Е.Семенова депутатсем уйрăмах активлă пулнине палăртмалла.
Район администрацийĕ тăрăшнипе кăçал Кĕçĕн Шăхале асфальтлă çулпа çыхăнтарма пултартăмăр. Пĕчĕк ялта пурăнакансемшĕн çакă тем пекех пысăк савăнăç пулчĕ.
Ялти социаллă ыйтусене татса парасси, халăха шывпа тивĕçтересси хуть те хăçан та çивĕч тăрать. Ахальтен мар ĕнтĕ Чăваш Республикин Президенчĕ Н.Федоров та ку ыйту çине яланах пысăк тимлĕх уйăрать. Тинтерех кăна-ха ĕçмелли паха шыв çинчен Указ кăларчĕ. Унта çапла каланă: «Çĕнĕ программа тĕллевĕсем: ĕçмелли шывпа тивĕçтермелли çăл куçсене çĕнетесси, сыхласси, вĕсемпе тирпейлĕ усă курасси». Çакна асра тытса ял тăрăхĕн администрацийĕ виçĕ пысăк çăла йĕркеллĕ тытса тăрать. Иккĕшĕнче çынсем кĕпе-йĕм чÿхеççĕ, тепринчен ĕçмелли шыв ăсаççĕ. Шыв колонкисем ялта 34. Кивелнипе вĕсем юрăхсăра тухаççĕ, çийĕнчех юсама тăрăшатпăр. Шыв ăсмалли тарасасем пурĕ улттă.
Килти хуçалăха аталантарма кирлĕ условисем туса парас тесе тăрăшатпăр. Ку енĕпе çăмăллатнă майпа кредитсем илме пулăшатпăр. Ю.Петров, Н.Константинов, А.Семенов, Н.Тапинов, В.Тапинов, Н.Михайлов, В.Иваншкин - 300-шер пин, В.Долгов-200, В.Софронов - 180, Н.Матвеев 150 пин тенкĕлĕх çăмăллăхлă кредит илчĕç. Çав укçа-тенкĕпе вĕсем ял хуçалăх техники, выльăх-чĕрлĕх туянчĕç, витесене реконструкцилерĕç.
Г.Федоровапа Ю.Чернов каялла тавăрса памалла мар субсидисем илсе çуртсем хăпартса лартрĕç.
Тинклерте пурăнакансем лавккасем инçере вырнаçнă пирки пăшăрханса пĕлтеретчĕç. Вĕсене пулăшса тенĕ пек Галинăпа Николай Воробьев предпринимательсем чаплă магазин туса лартрĕç. Лавкки пысăк çăл çывăхĕнче вырнаçнă май ятне те «Родник» ят пачĕç. Мĕнле кăна таварпа апат-çимĕç продукчĕсем çук-ши унта. Укçа кăна пултăр.
Ватă çынсемшĕн тăрăшасси те пирĕн тивĕç. Май килнĕ таран эпир вĕсене пулăшма тăрăшатпăр. Ваттисен кунĕнче ятарласа праçник туса паратпăр. Шкул ачисем вĕсене тĕрлĕ ĕçсем туса парса пулăшаççĕ. Аслă Отечественнăй вăрçă участникĕсем халĕ ялта тăваттăн: И.Софронов, И.Степанов, А.Петров, С.Алексеев. Медицина сестрисем вĕсен сывлăхне кашни эрнерех тĕрĕслесе тăраççĕ.
Тирпей-илемшĕн тăрăшасси, культура учрежденийĕсен ĕçне халăх ыйтнă пек йĕркелесси пирĕншĕн уйрăмах яваплă. Çитес çул пирĕн районта Республика кунне ирттернĕ май ял тăрăхĕн ĕç калăпăшĕ нумай ÿсет. ЧР Президенчĕн Указĕсемпе район пуçлăхĕн хушăвĕсене пурнăçа кĕртессине эпир хамăр ĕçре тĕпе хуратпăр.