13 декабря 2008 г.
Пирĕн районти потребительсен кооперацийĕ тĕрлĕ енлĕ аталанса пырать. Таварсене ваккăн сутассипе те, общество апатланăвĕн предприятийĕсен ĕçĕпе те, хăйсем продукци туса кăларассипе те курăмлă утăмсем тăваççĕ. Акă райпон обществăлла апатлану предприятинех илер-ха. Кăçалхи 11 уйăхра унăн таварçаврăнăшĕ 23 миллион та 870 пин те 285 тенкĕпе танлашнă. Ку иртнĕ çулхи çак вăхăтрипе танлаштарсан ытларах. Вĕсенчен хăйсем 11 миллион та 825 пин те 178 тенкĕлĕх продукци туса кăларнă. Пурĕ 80 тĕрлĕ паха продукци туса кăлараççĕ кунта. Обществăлла апатланăвăн пултаруллă та маттур ĕçченĕсен аллисем чăннипех ылтăн темелле. Вĕсем туса кăларакан продукцине районта кăна мар, ун тулашĕнче те хаваспах туянаççĕ. Раççейĕн тĕрлĕ регионĕсенче те вăл курăмлă вырăн йышăнать. «Сметанник», пельмень, çурма фабрикат йышши продукцисене халăх хапăлласах туянать.
Обществăлла апатлану предприятин «Юмах» кафене районти предприятисемпе организацисенче вăй хуракансем, уйрăм çынсем кăмăлласах çÿреççĕ. Кунти поварсем хатĕрлекен апат-çимĕç тутлă та техĕмлĕ теççĕ. «Юмахра» тăрăшса вăй хуракан Л.Викторова аслă повар, И.Михайлова повар, О.Степанова кассир, Г.Андриянова чашăк-тирĕк çăвакан ĕçе пысăк пахалăхпа пурнăçласа пыраççĕ. Л.Викторова аслă повар вара çак ĕçре 32 çул тăрăшса вăй хурать. Апатне чăннипех те лайăх хатĕрленĕрен «Юмахри чăн-чăн асамçăсем», теççĕ вĕсем пирки. Ахальтен мар ĕнтĕ вĕсен техĕмлĕ апатне тутанса пăхма кунне 300 ытла çын килет. 20 тĕрлĕ апат-çимĕç сĕнеççĕ вĕсем клиентсене. Кунта хатĕрленĕ шницель, гуляш, кăмакара пĕçернĕ шаркку пĕтĕмпех выльăх ашĕнчен. Туса кăларнă продукци экологи тĕлĕшĕнчен тивĕçтерет. Технологие те çирĕп пăхăнса ĕçлеççĕ. Пĕтĕмĕшле каласан райпон обществăлла апатлану предприятинче вăй хуракансем халăх ыйтăвне туллин тивĕçтерессишĕн тăрăшаççĕ.