13 декабря 2008 г.
Райпо системинче ĕçлекен кашни çын хăйĕн тивĕçне чыслăн пурнăçлама тăрăшать, ĕç çыннисен кулленхи ыйтăвĕсене тивĕçтерес тĕллевпе мĕн кирлине пĕтĕмпех тăвать. «Пирĕншĕн, кун-çулăма суту-илÿ ĕçĕнче ирттерекенсемшĕн, сутуçă ĕçĕ çывăхрах та, пĕлтерĕшлĕрех те. Пире халăх чăннипех те чыслă, çав вăхăтрах яваплă ĕç шанса панă, ăна тÿрре кăларса пырасси - кооператорсен тĕп тивĕçĕ», - теççĕ райпон «Все для дома» лавккинче вăй хуракан Нина Павловна Мелькова заведующипе Тамара Николаевна Федорова сутуçă. Ĕç стажĕ те вĕсен пысăк. Н.Мелькова райпо системинче - 27, Т.Федорова вара 35 çул тăрăшса вăй хураççĕ. Лавкка поселок центрĕнче вырнаçнă, иртсе çÿрекене, аякран килекене кĕрсе тухма меллĕ. Мĕн тĕрлĕ тавар çук пулĕ кунта. Чей сервисĕсем, савăт-сапа, хуçалăхра кирлĕ строительство материалĕсем, карас телефонсем тата ытти те пурте куç умĕнче. Тепĕр майлă каласан, çак лавккара туянакан хăйне мĕн кирлине пĕтĕмпех тупма пултарать. Строительство материалĕсене илес пулсан, вĕсене кунти сутуçăсене заказ тусан, вăхăтра тивĕçтерсе параççĕ. Пурĕ 800 яхăн тĕрлĕ тавар сĕнеççĕ пултаруллă сутуçăсем. Уйăхри плана тултарса пыма тăрăшаççĕ вĕсем. Кунне чылай паха тавар сутаççĕ. Лавкка вăл - суту-илÿ кăна мар, чун-чĕрене уçса калаçмалли вырăн та. «Все для дома» лавкккари сутуçăсем туянаканпа яланах ăш-пиллĕ те тарават. Вĕсен ырă кăмăлне кура çак лавккана татах та кĕрес килет. Райпо лавккисем çак пахалăхпа-хăтлăхпа тата сутуçăсен тараватлăхĕпе уйрăлса тăраççĕ.