13 декабря 2008 г.
Районта тухса тăракан «Хĕрлĕ ялав» хаçата 2009 çулăн пĕрремĕш çур çулĕ валли çырăнтармалли кампани вĕçленсе килет. Чылай коллективсем, уйрăм çынсем хăйсен юратнă хаçатне илсе тăма тахçанах подписка йĕркелерĕç. Ку ĕçе Мăнçырмари, Кивĕ Вăрмарти, Чулкасри, Пысăк Енккассинчи çыхăну уйрăмĕсенче уйрăмах лайăх туса пыраççĕ.
Кăçалхи çула республикăра Ырă ĕçсен çулталăкĕ тесе пĕлтернĕ. Çавăнпа кашниех ырă ĕç тума тăрăшмалла. «Урмарская» кайăк-кĕшĕк фабрики (Н.Петров), «Шигали» (А.Ульянов) хуçалăх, район больници (Н.Васильева), техника инвентаризацин бюровĕ (Н.Веселовский), Вăрмарти автотранспорт предприятийĕ (В.Васильев), элеватор (В.Александров), халăхăн йăла ыйтăвĕсене тивĕçтерекен комбинат (Ю.Кашмаков) район хаçатне производствăра ырă тĕслĕх кăтартакансене, ветерансене çулсерен çырăнса парса пархатарлă ĕç тăваççĕ. Ку енĕпе хăш-пĕр çынсем те лайăх пуçару тăваççĕ. Арапуçĕнчи Аслă Отечественнăй вăрçă участникĕ В.Теплов район хаçатне хăйĕн ачисене тата тăванĕсене çырăнса пачĕ. «Район хаçачĕ кашни килтех пулмалла, вăл район тĕкĕрĕ-çке. Район хыпарĕсене пурте пĕлсе тăччăр, пурнăçран юлса ан пыччăр», - тет Валентин Григорьевич.
Çак ырă пуçарусене пур çĕрте те анлă çул памалла. Ветерансене район хаçатне парнелени уйрăмах пысăк пĕлтерĕшлĕ. Вăл ветерансем хăй вăхăтĕнче çĕр-шыв экономикине тĕреклетессишĕн ырми-канми вăй-хунине хисеплени пулать.
«Эпĕ район хаçатне 50 çул ытла илсе тăратăп. Почтальон килессе чăтăмсăррăн кĕтетĕп. Чи малтанах алла «Хĕрлĕ ялава» ярса илетĕп. Район хаçатне интереслĕ пулнăран, ун урлă тĕрлĕрен информацисем илме май килнĕрен çырăнса илетĕп», - тесе çырать Çĕнĕ Шулханта пурăнакан 83 çула кайнă София Никитична Андреева ветеран. Çакăн евĕрлĕ çырусем редакцие килсех тăраççĕ. Вĕсен пурин те шухăшĕ пĕр евĕрлĕ - район хаçачĕпе туслă пуласси.
Редакци «Хĕрлĕ ялав» хаçата çырăнса илекенсем хушшинче декабрĕн 26-мĕшĕнче лотерея вылявĕ ирттерет. Хаçата çырăнса илнĕ чи телейлĕ 50 çынна парнесем кĕтеççĕ. Лотерея вылявĕччен шутлă кунсем юлчĕç. Хаçата çырăнма васкăр, район хыпарçисĕр ан юлăр.