10 декабря 2008 г.
Районти ачасемпе çамрăксен спорт шкулĕнчен пултаруллă самбистсем сахал мар тухнă. СССР спорт мастерĕсем - С.Васильев Тĕнче, Европа, Ази чемпионĕ тата призерĕ, В.Вишнев Тĕнче Кубокне çĕнсе илнĕ, Н.Казанцев СССРта мала тухассишĕн ирттернĕ ăмăрту çĕнтерÿçи, Николайпа Юрий Сейфуллинсем Тĕнче тата СССР кубокне çĕнсе илнĕ. Спорт шкулĕнчен СССР тата Раççей спорт мастерĕсем пурĕ 30 ытла çамрăк тухнă. СССРта мала тухассишĕн ирттернĕ ăмăртусенче призер пулнă пултаруллă самбистсенчен пĕри - Сергей Уливанов (Чулкас ялĕ).
СССР спорт мастерне С.Уливанова асăнса самбо енĕпе кĕрешсе арçын ачасемпе хĕр ачасем хушшинче мала тухассишĕн йăлана кĕнĕ XII турнира Хусан, Шупашкар, Çĕнĕ Шупашкар, Çĕрпÿ хулисенчен, Шăмăршă тата пирĕн район спортсменĕсем - пурĕ 105 ача хутшăнчĕ.
Акă Спорт çуртĕнчи залра спортсменсем пĕр рете йĕркеленсе тăнă. Ăмăртăва хутшăннисене район пуçлăхĕн заместителĕ - вĕрентÿ тата çамрăксен политикин пайĕн начальникĕ Ю.Соколов, ачасемпе çамрăксен спорт шкулĕн директорĕ С.Никитин саламларĕç, ăмăртăва хутшăнакансене ăнăçусем сунчĕç.
Ăмăртăвăн тĕп судйи Л.Уливанов тупăшу йĕркипе паллаштарчĕ.
Акă, ăмăртусем пуçланаççĕ. Кавир çине 1999 çулта çуралнă тата унтан та кĕçĕнрех 26 килограмм таран таякан арçын ачасем тухаççĕ. Çивĕч кĕрешÿре пирĕн район спортсменĕ П.Новиков (Вăрмар поселокĕ) виççĕмĕш вырăна тухать.
1997-1998 çулсенче çуралнисенчен çак виçере Г.Петров иккĕмĕш пулать. 30 килограмлă кĕрешÿçĕсен хушшинче В.Иванов (Чулкас) виççĕмĕш вырăн йышăнать.
41 килограмлă виçере А.Васильев (Чулкас) - виççĕмĕш.
67 килограмм таран таякан спортсменсем хушшинче призлă вырăнсене Д.Алексеевпа К.Михайлов çĕнсе илеççĕ.
32 килограмм таран таякан спортсменсем хушшинче малти пĕрремĕшпе иккĕмĕш вырăнсене А.Семеновпа С.Андреев (Чулкас) тивĕçрĕç.
35 килограмм таякан спортсменсем хушшинче А.Михайлов (Чулкас) малти пĕрремĕш вырăна никама та памарĕ, чемпион ятне тивĕçрĕ.
45 тата 78 килограмм таран таякан спортсменсем хушшинче те çĕнтерÿçĕсем Вăрмарсемех пулчĕç. В.Михайловпа А.Алексеев пĕрремĕш вырăнсене çĕнсе илчĕç.
Хĕр ачасем те пултаруллă кĕрешрĕç, район чысне çÿле çĕклерĕç. К.Мироновапа А.Иванова (иккĕшĕ те Чулкасран) пĕрремĕш вырăнсене çĕнсе илме пултарчĕç. Çакна та палăртмалла: самбистсене кĕрешĕве хатĕрлес тĕлĕшпе Н.Сейфуллин, Л.Уливанов, Н.Никитин тренерсем сахал мар тăрăшнă.
Ăмăртура пĕрремĕш тата иккĕмĕш вырăн йышăннă спортсменсене дипломсемпе наградăларĕç, хаклă парнесем парса чыс турĕç. Виççĕмĕш вырăна йышăннисем дипломсене тивĕçрĕç.