06 декабря 2008 г.
Мăнçырмара вырнаçнă çыхăну уйрăмĕ Çĕнĕ, Кивĕ Шулхан тата Эçпепе ялĕсене пĕрлештерсе тăрать. Çыхăну уйрăмне 5-мĕш çул ĕнтĕ Елена Ивановна Николаева начальник пулса ăнăçлă ертсе пырать. Унăн ĕçĕ нумай енлĕ. Хаçат-журнал валеçни çеç мар, апат-çимĕç продукчĕсем те сутаççĕ вĕсем, сăмахран, сахăр песукĕ, макарон, вермишель, тип çу çыхăну уйрăмĕнчен талса тăмасть. Кунта ĕçре пысăк опыт пухнă почтальонкăсем вăй хураççĕ. Илер-ха Тамара Григорьевăна. Вăл 21-мĕш çул çак ĕçре тăрăшать. Çитес çулхи çур çула «Хĕрлĕ ялав» хаçата 200 ытла экземпляр çырăнтарнă. Районта 1-мĕш вырăнта вĕсем. Кунта ĕнтĕ Елена Ивановна Николаеван тÿпи пысăк. Малтан вăл «Правда» колхозра, «Мусирминский» совхозра 25 çул бухгалтерта ĕçлерĕ. Улатăрти ял хуçалăх техникумне куçăмсăр майпа вĕренсе пĕтерчĕ. Кăçал çуллахи вăхăтра çыхăну уйрăмне тирпей-илем кĕртрĕç. Мăшăрĕпе, Анатолийпе, икĕ ывăлпа пĕр хĕр пăхса ÿстерчĕç. Анатолий «Ресурсы» агрофирмăра хăмлаçă пулса вăй хурать. Хĕрĕ, Алина, Шăхальти фельдшерпа акушер пунктĕнче ĕçлет. Икĕ ывăлĕ Мускава ĕçлеме çÿреççĕ. Нумаях пулмасть Елена Ивановна хăйĕн юбилейне - 50 çул тултарнине паллă турĕ. Çавăнпа та ăна малашне те ĕçре ăнăçусем, çирĕп сывлăх сунар.