06 декабря 2008 г.
Пирĕнтен кашниех ача çулĕсенчен пуçласа мĕн юлашки куна çитичченех чунра чи çывăх сăнара - пурне те ăнланакан, каçаракан, яланах пире шеллекен, ниме пăхмасăр пурне те юратакан анне сăнарне - упрать.
Çĕр çинчи чи хаклă çынсене уяв ячĕпе - Анне кунĕпе - саламлама пуçтарăнчĕç ялти библиотекăна ял тăрăхĕн администрацийĕн, культура çурчĕн, фельдшерпа акушер пункчĕн ĕçченĕсем, вĕренекенсемпе вĕрентекенсем. Паллах, чи сумлă, хисеплĕ хăнасем - пурнăç тĕрекĕ - Аннесем.
«Анне çумне эп тĕршĕнетĕп
Ун ăшшине чунпа туятăп», -
пуçларĕç 4-мĕш класра вĕренекенсем. Вĕсене йĕркелесе ертсе пыраканĕсем - класс ертÿçи З.Яковлева, музыка учителĕ О.Васильева, аслă вожатăй Г.Вотякова. Аннесене халалланă уявра сăвă хыççăн сăвă, юрă хыççăн юрă янăрарĕ. Юратнă амăшĕсем çинчен вĕренекенсем хăйсем те сăвă шăрçаланă иккен. Гурьев Дима аслă аппăшĕ Настя çырнă сăвва чуна пырса тивмелле вуласа пачĕ. Кашни сăввинче, кашни юрринче çĕр çинче аннерен çывăх та хаклă çын урăх çук текен шухăш палăрчĕ. Уява Т.Матвеева библиотекарь ертсе пычĕ. «Анне - кил ăшши. Аннесем умĕнчи парăма эпир нихăçан та татса пĕтерес çук. Анне юратать, ăнланать, каçарать, анчах ытла та кая юлса ăнланса илет çакна хăшĕ-пĕри пурнăçра», - терĕ Татьяна Станиславовна.
Пухăннисене уяв ячĕпе ял тăрăхĕн администрацийĕн тĕп специалисчĕ Ю.Казакова, хĕрарăмсен совечĕн председателĕ З.Илларионова, З.Яковлева, Г.Вотякова вĕрентекенсем саламларĕç, ăшă сăмахсем каларĕç.
Культура çурчĕн ĕçченĕсем мероприятисем ирттернĕ чухне тĕрлĕ вырăнта ĕçлекенсене хутшăнтарма тăрăшнине палăртмалла. Шкул ачисемсĕр пуçне уявра культура çурчĕн илемлĕх ертÿçи Л.Романова, ялти ФАП заведующийĕ Г.Павлова, район больницинче ĕçлекен С.Казакова медицина сестри, О.Васильева юрă ăсти, И.Николаева, Татьянăпа Карина Романовăсем хăйсен пултарулăхĕпе савăнтарчĕç.