03 декабря 2008 г.
«Урмарская» кайăк-кĕшĕк фабрикин ĕçченĕсем кăçал тухăçлă тыр-пул çитĕнтерчĕç. Тĕш тырăпа пăрçа йышши культурăсене кашни гектартан вăтамран 32 центнер пухса кĕртрĕç. Районти хуçалăхсен хушшинчи ăмăртура малтисен ретне тухрĕç.
- Ку пирĕншĕн чикĕ мар, - тет хуçалăх пуçлăхĕ Николай Петрович Петров. - Тĕш тырă культурисен тухăçне куллен ÿстерсе пыма тăрăшатпăр. Çав тĕллевпе Вăрнартан пысăк тухăç паракан çурхи тулăн «Эстер» элитлă вăрлăха 60 тонна илсе килетпĕр. Тюмень облаçĕнчен урпан супер элита «Красноуфимский - 100» вăрлăхне туянатпăр. «Паха вăрлăх - тухăç никĕсĕ», - тесе ахальтен каламаççĕ ĕнтĕ. Çакна фабрикăра тĕрĕс ăнланаççĕ. Паха вăрлăх хатĕрлесси çине пысăк тимлĕх уйăраççĕ. Хальхи вăхăтра çитес çуркунне акмалли вăрлăхсен пахалăхне лайăхлатас енĕпе икĕ звено йĕркеленĕ. Пĕр складĕнче В.Степановпа С.Ефимов рабочисем, тепринче О.Кудряшов слесарь-операторпа Г.Илларионова вăй хураççĕ. Иккĕшĕнче те сеялкăсене тухăçлă ĕçлеттереççĕ.
- 40 тонна урпана алласа тасатрăмăр ĕнтĕ. Тепĕр 20 тонна юлать ку складра. Ăна тасатса пĕтерсен тулă çине куçатпăр, - каласа парать О.Кудряшов оператор. Вĕсен ĕçне складсен заведующийĕ Т.Степанова йĕркелесе тăрать.
- Çитес çул акмалли мĕн пур вăрлăха акмалли чи пысăк кондицие çитерессипе ĕçлетпĕр. Тепĕр çулхине, Республика кунне пирĕн районта уявланă май, тухăçлă тыр-пул çитĕнтерессишĕн мĕн пур вăй-хала парăпăр, - тет хуçалăхăн тĕп агрономĕ Вячеслав Васильевич Нарзаев.