22 ноября 2008 г.
Иртнĕ юнкун районта Информаци кунĕ иртрĕ. Ăна ирттерме Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Р.Лизакова, Чăваш Республикин Патшалăх Канашĕн депутачĕ, Чăваш Республикинче ветеринарипе фитосанитари енĕпе ĕçлекен Федераллă служба управленийĕн руководителĕ И.Дмитриев, Чăваш Республикинчи «Хыпар» Издательство çурчĕ» Патшалăх унитари предприятийĕн генеральнăй директорĕ - тĕп редактор А.Леонтьев, Чăваш Республикинчи Патшалăх Канашĕн депутачĕ, ЧР «Фармация» Патшалăх унитари предприятийĕн генеральнăй директорĕ В.Филимонов килнĕ.
Информаци кунĕнчи тĕп ыйтусем - Раççей Президенчĕ Д.Медведев Федераци Пухăвне янă Çырури задачăсене сÿтсе явасси тата халăх шухăшне пĕлесси. Çавăн пекех граждансене социаллă хÿтлĕх парассине вăйлатасси, бюджетниксене ĕç укçине çĕнĕ системăпа тÿлессине пурнăçа кĕртесси, пурнăç условийĕсене лайăхлатасси, ЧР Президенчĕн Н.Федоровăн «Чăваш Республикинчи автомобиль çулĕсем тăвассине хăвăрт вĕçлес енĕпе пурнăçламалли мерăсем çинчен» Указне пурнăçланин пĕтĕмлетĕвĕсемпе паллашасси, Чăваш Енри усă курман çĕрсене ĕçе кĕртесси тата ял хуçалăх ĕçĕсене пĕтĕмлетесси пулчĕ.
Палăртнă ыйтусене сÿтсе явма вĕсем виçĕ ушкăна пайланса Вăрмар хула, Энĕшпуç, Пинер ял тăрăхĕсенче пулчĕç.
Район пуçлăхĕн ĕçĕсене вăхăтлăха туса пыраканĕ Н.Павлов ертсе пыракан ушкăн Энĕшпуç ял тăрăхĕнче пулчĕ. Унăн пуçлăхĕ О.Иванов ял тăрăхĕн социаллă экономика аталанăвĕ пирки кĕскен паллаштарнă хыççăн модельлĕ библиотекăна, вăтам шкула çитсе курчĕç, кунти коллективпа тĕл пулчĕç. ЧР культура, национальноçсен ĕçĕсен, информаци политикин тата архив ĕçĕн министрĕ Р.Лизакова информаци кунĕнчи ыйтусене хускатрĕ, тĕрлĕ ыйтусем çине хуравларĕ. Çавăн пекех Роза Михайловна вăтам шкулти Çар Мухтавĕн музейне çитсе курчĕ. Унтан граждансене хăйсен ыйтăвĕсемпе йышăнчĕ.