15 ноября 2008 г.
Район кунсерен тенĕ пек малалла аталанса пыни, унăн социаллă ыйтăвĕсене татса парасси лайăхланни куç кĕрет. Культура, вĕрентÿ, воспитани тата ытти те комплекслă пулса пырать. Библиотекăсенчен чылайăшĕ тĕслĕхлисен йышне куçса пĕтнĕ, клубсемпе культура çурчĕсене çĕнетме пуçланă. Физкультурăпа сывлăха çирĕплетекен комплекс кĕçех хута каймалла. Чукун çулăн çĕнĕ вокзалне тăвасси те вырăнтан тапраннă. Предпринимательлĕх те кунсерен вăй илсе пырать, аталану çулĕ çинче çирĕппĕн тăрать.
Районти предпринимательсен йышĕ хушăнсах пырать. Вĕсем бизнес тунипе пĕрлех халăха ĕçпе тивĕçтереççĕ. Район центрне, ялсене илемлетме хастар хутшăнаççĕ. Ĕçчен предпринимательсенчен пĕри чунĕпе çирĕп, кăмăлĕпе ачаш та черчен хĕрарăм Вера Михайловна Енькова пирки пырĕ паян сăмах. Вăл хăйĕн ĕçне мĕн çамрăкран суту-илÿ енĕпе çыхăнтарнă. Кун пек чух опычĕ пуян, практики вара çав тери çирĕп теççĕ. Чăннипех те пурнăç уттипе пĕр шайра пыракан предприниматель. Вăл республикăри тата районти вак тата вăтам предпринимательлĕхе аталантарас енĕпе ĕçлекен координаци канашĕн членĕ. Чылайранпа ĕнтĕ унăн «Все для Вас» лавкка район халăхне тĕрлĕ таварсемпе тивĕçтерет. Халĕ вара район центрĕнче тепĕр лавкка - «Мой дом» чаплă лару-тăрура уçăлчĕ. Кунта халăх чылай пухăннă.
Райадминистрацин экономика, промышленность, суту-илÿ тата экономика аталанăвĕн пайĕн начальникĕ Н.Краснова хĕрлĕ хăю каснă май районта вак предпринимательлĕх вăй илсе аталанса пыни çинчен тата В.Енькова ĕçĕ-хĕлĕ пирки чарăнса тăчĕ. Çĕнĕ лавкка уçăлнă ятпа саламларĕ.
Лавкка уçма хутшăннисенчен чылайăшĕ В.Енькована ăшă сăмахсем каларĕç, асăнмалăх парнесем пачĕç. Çĕнĕ лавккара чи пĕрремĕш тавар туянакан вара район Пухăвĕн депутачĕ В.Иванов пулчĕ. Çавăн пекех тавар туянакан тепĕр 30 çын лотерея вылявĕсене тивĕçрĕç. Савăнăçлă лару-тăрăва чăваш çăлтăрĕсем А.Шадриков, Татьяна тата Дипендра Мани Инди каччи илемлĕ юррисемпе татах та пуянлатрĕç. В.Енькова предпринимательпе пĕрле савăнăçа пайлама килнисем кăмăллă пулчĕç. «Районта предпринимательлĕх малалла та аталансах пытăр», - терĕç. Республика кунĕ умĕн лавкка уçăлни районти вак предпринимательлĕх тепĕр утăм малалла кайниех пулчĕ. Апла пулсан В.Енькова предприниматель малтан-мала кайса çĕнĕ ÿсĕмсем тутăр.