12 ноября 2008 г.
Октябрь уйăхĕнче районти тĕп библиотека ĕçченĕсем йĕркеленипе литературăн кĕрхи вулавĕсем иртни çинчен пĕлтернĕччĕ. Çак хушăра кăсăклă мероприятисем йышлă иртрĕç. Уйăхлăх «Ентешсен хайлавĕсем» паллашу-курав йĕркеленипе уçăлчĕ. Унтан Василий Алентейпе Мария Волкова çыравçăсене асăнса «Икĕ çыравçă - икĕ шăпа», «Алентей çĕр-шывĕнче», «Автор вулать» литература каçĕсем, «Литературăллă Вăрмар» информаци кунĕ, Чăваш писателĕсен çĕнĕ кĕнекисемпе паллаштаракан «Пĕрремĕш вулав» презентаци иртрĕ. «Литературăллă кĕркуннепе тĕл пулни» ятпа библиотека ĕçченĕсем районти предприятисенче «литература десанчĕпе» пулчĕç.
Уйăхлăх вара Пысăк Енккассинче «Санăн яту çуталса тăтăр» литература каçĕпе вĕçленчĕ. Мероприяти Мария Волкова «Юрăç-поэт, лирик-поэт» электронлă презентаципе пуçланчĕ, унпа ялти библиотека заведующийĕ Н.Никонорова паллаштарчĕ. Çак кун поэтесса сăввисене шкул ачисем, вĕрентекенсем вуласа пачĕç, вĕсем Мария Волкован сăввисенчи пур илемлĕхпе, трагизмĕпе паллаштарчĕç. Поэтесса çырнă сăвăсем тăрăх Татьянăпа Алена Павлова, кунти Культура çурчĕн художествăлла пултарулăх ертÿçи Н.Гаврилов аккомпаниаторпа пĕрле çепĕç юрăсем шăрантарчĕç.
Çавăн пекех Р.Иванова библиотекарь «Çĕнĕ ятсене уçатпăр» кĕнеке презентацине ирттерчĕ. Çак кĕнекере хамăр ентешсен - Т.Шутнерăн, А.Трофимован, А.Михайловăн хайлавĕсем пулни чăн та савăнтарчĕ.
Тĕп библиотека ĕçченĕсем хăйсем хатĕрлесе кăларнă библиографи указателĕсемпе паллаштарчĕç. Çамрăксем ытларах çĕнĕлĕх технологийĕсемпе усă курнă пирки «Нарспи» поэмăна пичетлесе кăларнăранпа 100 çул çитнĕ май хатĕрленĕ «Чăваш поэзийĕн ахахĕ» электронлă курав йĕркелерĕç. Тĕл пулăва библиотекарьсем пĕччен килмен, вĕсемпе пĕрле Т.Нимакова сăвă çырма юратакан та пулчĕ, çĕнĕ сăввисемпе паллаштарчĕ. Юлашкинчен Пысăк Енккасси шкул директорĕ Г.Архипова сăмах илчĕ, мероприятие йĕркелесе ирттернисене тав турĕ.