01 ноября 2008 г.
Мĕн тери хăвăрт чупать вăхăт. Çĕнĕ вĕренÿ çулĕ пуçланнăранпа икĕ уйăх кăна иртрĕ, акă каникул та çитрĕ. Апла пулин те кăçалхи кĕркунне ăшă кунсемпе чылай савăнтарчĕ. Çакăн пек кунсенче Анаткас ялĕнчи Л.Ромашкина (9 кл.), К.Ромашкина (8 кл.), С.Ромашкина ( 1 кл.), Д.Филиппов (4 кл.), Н.Иванова (8 кл.), В.Иванов (4 кл.) пĕр ĕçрен те пăрăнса юлмарĕç. Шкулти уроксем вĕçленнĕ хыççăн вĕсем пушă вăхăт тупса пурте пĕрле пуçтарăнса çăл тасатрĕç, урама тирпейлеме те ÿркенмерĕç ачасем. Республика шайĕнче иртекен «Йывăç ларт тата ăна упра» акцие хутшăнса вĕсем вуншар-вуншар йывăç лартса хăварчĕç. Кашни кунах кĕтÿ яла кĕнĕ вăхăтра Димăпа Ваня йывăçсене качака-сурăхсем ватасран сыхлаççĕ. Çамрăк хунавсене ачасем ял çывăхĕнчи вăрмантан кайса кăларса килчĕç. Ăвăс, çĕмĕрт, хурама, хурăн, пилеш хунавĕсене лартрĕç вĕсем.