29 октября 2008 г.
Районсенче Республика кунне уявласси ырă йăлана кĕчĕ. Кашни çулах июнь уйăхĕн шăрăх кунĕсенче район центрĕсенче пин-пин çын пухăнса савăнать. Малашлăхăн уттипе тан пыма çирĕп тĕллев палăртать. Кăçалхи çула Чăваш Президенчĕ Н.Федоров Ырă Ĕçсен çулталăкĕ тесе пĕлтернĕ. Мĕнле кăна ырă улшăнусем пулса иртмерĕç-ши ку таран? Промышленноçпа ял хуçалăх экономики палăрмаллах ÿсни курăнать. Строительствăра та ав çитĕнÿсем ÿсĕмлĕ. Кашни çул пин-пин тăваткал метр пурăнмалли çурт-йĕр хута каять, инфраструктура аталанать. Нумай çул тертленсе черетре тăнисене кредитсем илме çулсем уçса пачĕç. Ку енĕпе патшалăх яланах алă пама хатĕр. Килес çул пирĕн районта та Республика кунне уявлама хатĕрленеççĕ. Ку пархатарлă мероприятин планне палăртса хунă та ĕнтĕ. Район администрацийĕ ку енĕпе пуçаруллă ĕçсем туса ирттерет: тирпей-илемшĕн, тасалăхшăн кĕрешни куç кĕрет.
Центрти йăла-йĕрке, суту-илÿ çурчĕсене çĕнетсе илемлетни те çакăн çинченех калать. Çитменлĕхсене пĕтерме хал та, вăхăт та пур-ха пирĕн. Паянхи ĕçе ырăпа хăвармалли пахарах ĕнтĕ. Республика кунĕ тĕлне ав районта спорт комплексĕ хута каймалла. Спортпа туслашакан кирек хăçан та сывлăхпа хавшак мар. Этем сывлăхлă пулнипе пуян. Çакăн çинчен иртнĕ кунсенче Раççей Президенчĕ Д.Медведев телевиденипе тепĕр хут аса илтерчĕ. Спорт комплексĕ Чăваш Президенчĕн Н.Федоровăн планĕпе ÿссе лармалла. Аякран куçа илĕртекен, чуна çĕклентерекен объекчĕ шкул ачисемшĕн, спорта чунпа парăннисемшĕн хаклăран та хаклă парне пулĕ вăл. Иртсе çÿрекен ăмсанса пăхать çак капмар та илемлĕ çурта. Ашшĕ-амăшĕ те чăтăмсăррăн кĕтет хăйĕн пепкине çак асамлă юмах тĕнчипе паллаштарма. Кĕçех çак вăхăт çитмелле, нумаях юлмарĕ, чăтăмлăх кăна кирлĕ. Район центрĕнче çеç мар, ялсенче те тирпей-илем кĕртессине айккине хăвармалла мар. Ял тăрăхĕсен пуçлăхĕсен çанă тавăрса ĕçлемелле ку енĕпе. Хамăр район ятне-шывне, чысне хăнасен умĕнче кăтартма пирĕн хăват та, тараватлăхĕ те çителĕклĕ. Юлашкинчен çапларах каламалла пуль: «Вăрмар çулĕ вăрăм мар, килĕр, туссем, савăнар!»