29 октября 2008 г.
«Арабоси» агрофирма тулли мар яваплă обществăра хуçалăх экономикине тĕреклетессишĕн чунне парса ĕçлекенсем сахал мар. Механизаторсен хушшинче те, выльăх-чĕрлĕх пăхнă çĕрте те вуншарăн шутланаççĕ вĕсем. Çавсем çинчен пырĕ паян сăмах. Кам-ха пысăк хисепе тивĕçнĕскерсем? Паллашăр. Пĕри - дояркăра вунсакăр çул тÿрĕ кăмăлпа ĕçлекен, хăйĕн мĕн пур хастарлăхне паракан Венера Тимофеевна Михайлова. Фермăна ялти вăтам шкултан вĕренсе тухнă хыççăнах килнĕ. Хăйĕн пĕлĕвне тата ĕçри ăсталăхне çулран-çул ÿстерсе пырать. Çавăншăн ăна коллективра хисеплеççĕ. 2005 çулта кашни ĕнерен 3517 килограмм сĕт суса илнĕ пулсан, тепĕр çулхине вăл çак кăтартăва 4367 килограма çитерчĕ, урăхла каласан, тăруках 850 килограмм таран ÿстерме пултарчĕ. Кăçалхи кăтартăвĕсем те лайăх унăн. Пĕлтĕр тăхăр уйăхра кашни ĕне пуçне 2902 килограмм сĕт суса илнĕ пулсан, кăçал вара 3813 килограма çитернĕ, каллех 911 килограмм нумайрах. Çакăн пек çине тăрса ĕçлесен Венера Михайлован 5000 килограмлă чикке çитме те инçе мар. Зооветеринари требованийĕсене çирĕп пурнăçласа пыни, ĕнесене тулăх рационпа апатлантарни пулăшать те ĕнтĕ ăна.
Районти тата хуçалăхри экономикăллă ăмăртура яланах призлă вырăнсене çĕнсе илет. Ахальтен мар ĕнтĕ ĕçре ырă тĕслĕх кăтартнăшăн пултаруллă дояркăна район администрацийĕпе хуçалăх дирекцийĕ темиçе хутчен те грамотăсемпе наградăланă, хаклă парнесем парса хавхалантарнă.
Районта иртнĕ кăçалхи Акатуй халĕ те унăн асĕнчех. «2008 çулхи районти чи лайăх доярка» ят пани çинчен хĕрлĕ хăю çыхса ячĕç, пĕрремĕш степеньлĕ Дипломпа наградăларĕç, хаклă парне парса чыс турĕç.
Кăçал Республика кунне халалласа Елчĕк районĕнчи «Прогресс» акционерсен хупă обществинче республикăра ĕнесене машинăпа сăвакансен тата ĕнесене искусствăлла майпа пĕтĕлентерекенсен конкурсне хутшăнма тивĕçлĕ пулчĕ Венера Тимофеевна.
«Республика конкурсĕнче район тата агрофирма чысне вăл чăннипех те пултаруллăн хÿтĕлерĕ. Ĕне сумалли аппарата лайăх пĕлнине, хăйĕн ĕçне чунтан парăннине кăтартса пачĕ. Çак хуçалăхранах конкурсра пулнă Е.Семенова осеменатор та ырă сăмаха тивĕçлĕ пулчĕ. Вăл аслă пĕлÿллĕ специалист. Чăваш ял хуçалăх институчĕн зоотехника факультетне вĕренсе пĕтернĕ. Фермăра 18 çул вăй хурать. Институтра илнĕ пĕлÿпе практикăра анлăн усă курать. Конкурса хутшăннисене Чăваш Республикин Министрсен Кабинечĕн Председателĕн çумĕ - ял хуçалăх министрĕ М.Игнатьев саламларĕ, ĕçре ăнăçусем сунчĕ. Пирĕн ентешсем те парнесене тивĕçрĕç, - - тулли кăмăлпа каласа парать вĕсемпе пĕрле унта пулнă райадминистрацин ертсе пыракан специалист-эксперчĕ О.Васильев зоотехник. Конкурса хутшăнса хăйсен ăсталăхне малалла туптани вĕсене вăй-хăват хушать, çĕнĕ çитĕнÿсем тума хавхалантарать. Дояркăн кăçалхи тĕллевĕ - кашни ĕнерен 5000 килограмран кая мар сĕт суса илесси.