22 октября 2008 г.
Чупайĕнчи Галина Александровна Николаевана тахçантанпах лайăх пĕлетĕп. Кăçал вăл 81 çул тултарчĕ. Нумай çул бухгалтерта тăрăшрĕ. Хăй вăхăтĕнче Чупайĕнчи «Дружба» колхоз тыр-пул тата выльăх-чĕрлĕх продукчĕсем туса илес енĕпе республикăра кĕрлесе тăнă. Ахальтен-и, тухăçлă тыр-пул çитĕнтернĕшĕн В.Григорьевапа К.Николаева Социализмла Ĕç Геройĕ ята параççĕ. Нумайăшĕ орденсемпе медальсем илме тивĕçнĕ. Хуçалăх тĕреклĕ пулнинче, паллах, финанспа хуçалăх ĕç-хĕлне çирĕп тытса пынă, шут ĕçĕнче 40 çул вăй хунă Галина Александровнан тÿпи те пулнах ĕнтĕ.
... Вăрçă çулĕсенче вăл Вăрмарти вăтам шкултан вĕренсе тухать. Унтан Тĕрлемесри ял хуçалăх шкулĕнче вĕренет, бухгалтер специальноçне илет. Ун хыççăн тăван ялта, «Дружба» колхозра ĕçлеме тытăнать.
- Малтан мана учетчица ĕçне хушрĕç. Колхозра 6 уй-хир бригадиччĕ. Бригадирсем колхозниксем ĕçлени çинчен документсем тăрататчĕç. Колхоз председателĕ Иван Григорьевич Григорьев пуринчен те питĕ çирĕп ыйтатчĕ. Пире, канцелярире ĕçлекен бухгалтерсене, учетчиксене, техслужащисене ĕç хыççăн колхоз ĕçне хутшăнман колхозниксем патне килне янă, вĕсене правленине чĕнсе килмелле пулнă. Унта вĕсене сÿтсе явнă, тивĕçлĕ мерăсем йышăннă, - аса илет иртнĕ вăхăтсене Николаева ĕç ветеранĕ.
1948 çулта ăна кассира куçараççĕ. 1953 çулта аслă бухгалтер пулма çирĕплетеççĕ. Хăйĕн ĕçне тÿрĕ кăмăлпа пурнăçланăшăн, учетпа отчет ĕçне лайăх йĕркеленĕшĕн Г.Николаевана ĕççынни депутачĕсен Вăрмар район Совечĕ Хисеп грамотипе наградăлать.
Пĕр вăхăт ял хуçалăх управленийĕн тĕп бухгалтерта В.Константинов, унăн заместителĕнче М.Садовников ĕçлени çинчен ырăпа асăнать шут ĕçĕн ăсти. Вĕсем бухгалтер ĕçне тăтăшах тĕрĕслесе тăни, яланах пулăшма тăрăшни çинчен лайăх енĕпе каласа парать.
Çапла вара 40 çул хушшинче Галина Александровна мĕнле кăна должноçсем йышăнман. Юлашки 11 çулне, мĕн пенсие тухичченех, тĕп бухгалтерăн заместителĕнче тăрăшать. Каярахпа ревкомисси членĕн тивĕçĕсене пурнăçлать.
Ытти наградăсемпе пĕрлех унăн кăкăрне «1941-1945 çулсенчи Аслă Отечественнăй вăрçă çулĕсенче хастар ĕçленĕшĕн» тата «Ĕç ветеранĕ» медальсем илем кÿреççĕ.
1954 çулхи июль уйăхĕнче Галина Александровнапа Алексей Николаевич Николаев пĕрлешсе çемье çавăраççĕ. Хаяр вăрçăн вут-çулăмĕ витĕр мухтавлăн утса тухнă А.Николаев ветеран. Карели фрончĕсенчи çапăçусенче хастарлăх кăтартнăшăн ăна «Паттăрлăхшăн» медальпе наградăлаççĕ. Ун хыççăн вăл Венгрие, Австрие ирĕке кăларассишĕн пынă хаяр çапăçусене хутшăнать. Каллех «Паттăрлăхшăн» медаль тата III степень Мухтав орденĕ илме тивĕç пулать.
Хĕвелтухăç Европăри çĕр-шывсене ирĕке кăларассишĕн пынă çапăçусенче паттăрлăх кăтартнăшăн Верховнăй Главнокомандующи приказĕпе тав туни çинчен çирĕплетсе калакан хучĕсем те чылай унăн.
Хаяр вăрçă хирĕсенчен салтак тăван киле 1949 çулхи апрель уйăхĕнче таврăнать. Мирлĕ ĕçе кÿлĕнет. Малтанхи вăхăтсем унăн чукун çул çинче иртеççĕ. Кондукторта, ун хыççăн весовщикра вăй хурать. Вĕсем ултă ача пăхса ÿстерсе вĕсене пурнăç çулĕ çине кăлараççĕ. Пурте пĕлÿ илнĕ, кашнийĕнех хăйĕн çемйи пур. Савăнмалăх, мухтанмалăх мăнукĕсем те ÿсеççĕ. Питех те шел, 2001 çулхи декабрь уйăхĕнче, чире пула, фронтовик хăйĕн çемйинчен уйрăлса каять.
Хăйĕн ĕмĕрĕнче миçе çынна бухгалтер ĕçне хăнăхтарман-ши Галина Александровна. Çамрăксен наставникĕ пулнă. Ăс панăшăн, вĕрентнĕшĕн пĕрле ĕçленĕ юлташĕсем ăна паянхи кун та тав тăваççĕ. Тав сăмахне вăл чăннипех те тивĕçлĕ.
Халĕ те килте алла усса лармасть вăл. Çулĕпе çамрăках мар пулин те, кайăк-кĕшĕк усраса вĕсемпе киленет.