22 октября 2008 г.
«Республикăри пысăк предприятисем управлени ĕçĕн çĕнĕ шайне тухрĕç, çакă вĕсене продукци кăларассине ÿстерме, Раççей потребитель рынокĕнче малти вырăнсене йышăнма май пачĕ», - тенĕ ЧР Президенчĕ Н.Федоров Патшалăх Канашне янă Çырăвĕнче. Предприятисем пирки сăмах пуçарнă май, «Вăрмарти çĕвĕ фабрики» акционерсен хупă обществи ÿсĕм çулĕпе пырать. Çавна май кăçалхи 9 уйăхри кăтартусем те курăмлă. çак тапхăрта уйăхра пурĕ 13 миллион та 800 пин тенкĕлĕх продукци туса кăларнă. Ку иртнĕ çулхи çак вăхăтрипе танлаштарсан 23 процент ытларах. Хальхи вăхăтра кунта 180 çын тăрăшса вăй хурать. Вĕсенчен çамрăксем - 30. Йышлă коллективра ĕç кал-кал пулса пырать.
«Пахалăх - ăнăçлăх çулĕ», - теççĕ кунта тăрăшса вăй хуракансем. Çавăнпа та ку е вăл изделие çĕленĕ чухне ГОСТ требованисене çирĕп пăхăнаççĕ. Пурĕ 15 тĕрлĕ издели туса кăлараççĕ кунти ăста алăллă рабочисем. Хатĕр продукцине Мускав хулине ăсатаççĕ. Халĕ вара хĕрарăмсем валли «Драйв» çĕнĕ ĕç костюмĕ çĕлеме тытăннă. Ку тĕлĕшпе çĕвĕçсен пĕрремĕш бригади ăнăçлă ĕçлесе пырать.
Н.Корсакова мастер, С.Иванова, А.Ефимова, Н.Козлова, О.Герасимова, А.Васильева çĕвĕçсем ĕçе пысăк пахалăхпа пурнăçлаççĕ. Вĕсемпе пĕрлех 4-мĕш бригадăри Т.Алексеева тăрăшулăхне палăртмалла. Çавăнпа та фабрикăна Мускаври пысăк çĕвĕ фирмисем шанаççĕ, заказсем чылай параççĕ. «Пурлăхпа техника базине çирĕплетсе пырасси те тĕп тĕллевсенчен пĕри шутланать. Иртнĕ çул çĕнĕ çĕвĕ машинисемпе фабрикăна тивĕçтернĕ. Кăçал вара цехсенчи чÿречесене çĕнĕрен пластик кантăксемпе улăштарассипе ĕçлетпĕр. Пĕтĕмĕшле каласан малашлăх тĕллевĕсем пысăк. Фабрикăна аталантарса, çĕнетсе пырса халăх валли ĕç вырăнĕсем тата та ытларах туса парасси», - тет С.Белоусова директор. Эппин фабрика малашне те пысăк ÿсĕмсем тăвасса шанас килет.