18 октября 2008 г.
Футболла выляса республикăра мала тухассишĕн ирттернĕ чемпионат вĕçленчĕ. Юлашки турта пирĕн футболистсем Шупашкарта «ОМОН» командăпа тĕл пулса вылярĕç. Вăйă хуçисем атакăланипе пуçланчĕ. Пĕрремĕш тайм вĕçĕнче вĕсем шут уçрĕç. Тăхтав хыççăн пирĕн футболистсем вăйлăрах выляма пуçларĕç, шута танлаштарчĕç. Омоновецсем пенальтире шута икĕ хут ÿстерчĕç. Çапла вара пире 2:0 шутпа çĕнтерсе, вĕсем ушкăнра 12 очко пухса пĕрремĕш вырăн йышăнчĕç. Тепĕр вăйăра «Чурачики» ФК Шупашкарти «Нектар» командăпа выляса 0:0 шутпа вĕçлерĕ. Çакăн хыççăн «ОМОН» команда хыççăн «Чурачики» ФК 9 очко тухса иккĕмĕш вырăна тухрĕ. «Урмары» ФК тата «Нектар» командăсем, 5-шер очко пухса, 3-мĕшпе 4-мĕш вырăнсене йышăнчĕç. Кăçалхи сезон çакăнпа вĕçленчĕ. Вăл пирĕн командăшăн ăнăçлă пулчĕ темелле. Вăрмарсем пурĕ 22 вăйă вылянă, 16-шĕнче çĕнтернĕ, 3-шĕнче вăйă никам çĕнтерейменнипе вĕçленнĕ, 3-шĕнче выляса янă. Пурĕ 66 мечĕк тапса кĕртнĕ, хамăрăн хапхана 23 кĕртнĕ. Пĕрремĕш тапхăрта хăйсен ушкăнĕнче пирĕн команда пĕрремĕш вырăн йышăннă. Иккĕмĕш тапхăрта та малтан пĕрремĕш вырăнта пынă, анчах кайран вăй пĕтсе çитрĕ пулмалла, виççĕмĕш вырăна юлчĕ, призлă вырăншăн малалла кĕрешме пултараймарĕ. Ку сезонта çак футболистсен пултарулăхне уйрăмах палăртмалла: вратарь - Д.Семенов, хÿтĕлекенсем - А.Иванов, Т.Иванов, А.Ларионов, О.Капитонов, А.Егоров, çурма хÿтĕлевçĕсем - В.Митрофанов, С.Пахинов, К.Степанов, В.Георгиев, В.Игнатьев, И.Никитин, С.Петров, тапăнакансем - А.Иванов, Д.Егоров, С.Илларионов, А.Краснов.
Пире спонсор пулса пулăшнă тата сезон тăршшĕпех пирĕншĕн тăрăшнă «Спорт çурчĕ - Текстильмаш» акционерлă хупă обществăн директор заместительне С.Лушина, «Связь-Сервис» тулли мар яваплă обществăн директор заместительне С.Феоктистова, «Урмарский хлеб» уçă обществăн генеральнăй директорне А.Иванова, Вăрмар хула тăрăхĕн пуçлăхне А.Васильева, «Вăрмар пасарĕ» МУП руководительне Г.Николаева, «Нива» тулли мар яваплă обществăн руководительне К.Никитина, уйрăм предпринимательсене - В.Волкова, Г.Назарова, С.Илларионова, А.Егорова уйрăмах тав сăмахĕ калас килет. Мини-футбол сезонĕ пуçланиччен вăхăт нумай юлмарĕ. Çак уйăхăн вĕçĕнче район чемпионачĕ, ноябрь уйăхĕнче республикăра мала тухассишĕн ăмăртусем пуçланаççĕ. Çав ăмăртусене Вăрмарсен виçĕ команди: «Урмары» ФК, «Аниш» тата «Вива» хутшăнаççĕ.