15 октября 2008 г.
Тăван ялăм, тăван кĕтес. Кирек камшăн та вĕсем çывăх, хаклă. Такăрлатнă шкул сукмакĕ, ачалăх, çамрăклăх тăван ялта иртет-çке! Ют хулана е çĕр-шыва кайсан та тăван ялăм яланах куç умĕнче.
Манăн савнă ялăм Шутнерпуç илемлĕ вырăнта ларать. Ялта тăрна куçĕ пек таса пĕве пур. Кунтан çу кунĕсенче ачасем татăлма пĕлмеççĕ, вăрахчен вăлтапа пулă тытаççĕ, шыва кĕрсе савăнаççĕ.
Ялпа юнашар вăрман кашласа ларать. Яштака пÿ-силлĕ хурăнсем, патвар юмансем, симĕс чăрăшсем ÿсеççĕ унта. Вăрман кучченеçпе пуян: пан улмипе, кăмпапа, çырлапа. Кирек кам та вăрмана кайсан пушă алăпа таврăнмасть. Çулсерен пĕлĕтелле икĕ хутлă çуртсем кармашаççĕ. Урамсем таса та тирпейлĕ. Ял халăхĕ ĕçчен те сăпайлă.
Ял халăхĕ кирлĕ тавар туянма çĕнĕ лавккана çÿрет. Унта ырă кăмăллă Ира аппапа Наташа аппа тăрăшаççĕ.
Тăван ялăм Татьяна Шутнерпа, поэтессăпа, паллă. Вăл «Открываем новые имена - Çĕнĕ ятсем уçатпăр» республикăри литература конкурсĕнче çĕнтернĕ. Манăн унăн пĕр сăввипе паллаштарас килет.
Тек савăнтармĕ çулçăсен ташши.
Тахçан кунта шур хурăнсем ÿсетчĕç,
Ял варринчех ларатчĕç кашласа -
Кам аллисем-ши вĕсене пĕтерчĕç;
Урам кичеммĕн юлчĕ çаралса.
Халь асилетĕп те епле шавлатчĕç,
Каçпа чĕнетчĕç сулхăн ытамне.
Вĕсем манпа çын евĕр калаçатчĕç,
Ялан илтеттĕм эпĕ çĕннине.
Çухалчĕ халĕ йывăçсен шăв-шавĕ,
Тек савăнтармĕ çулçăсен ташши,
Пулнах-ши вĕсене касма сăлтавĕ,
Нивушлĕ пулса тăчĕç ытлашши;
Хурăнсем, тархасшăн, каçарсамăр,
Илтсемĕр чĕрери сăмахăма,
Ыйтатăп, тархаслатăп, каçарсамăр
Сире пултарайманшăн упрама.
Сăвви кичемрех, анчах тăван ялăма кăмăллатăп. Ялăм малалла та аталансах пытăр.