15 октября 2008 г.
Вăрмарти ачасен ÿнер шкулĕпе районăн тĕп библиотека ĕçченĕсем пĕрле Арапуçĕнчи Ваттисен çуртĕнче пулса кунта пурăнакансене Ваттисен кунĕ ячĕпе саламласа интереслĕ мероприяти ирттерчĕç. Кĕрхи сăнарлăхпа ватлăхра пĕрле çыхăнтарнă сценари тăрăх Г.Корытниковăпа Э.Демьянова библиотека ĕçченĕсем ертсе пычĕç. Кунта поэт-ентешĕмĕр Николай Пархатар хăйĕн юлашки тапхăрта кĕр темипе çыхăннă сăввине вуласа пачĕ. Итлекен ватăсем ăна ăшшăн саламласа кĕтсе илчĕç. Концертра Галина Корытникова Н.Ивановăн «Хуркайăксем вĕçеççĕ кăнтăра», «Ан кÿрен, манми савни», «Купăс кĕвви янăрать» ятлă юррисене чĕрен пысăк туйăмĕпе шăрантарса итлекенсене питех те савăнтарчĕ.
Концерта хутшăннă Чăваш Республикин музыка обществин тава тивĕçлĕ деятелĕсем - Ефим Ефимовпа Анатолий Иванов пĕрле Н.Ивановăн «Элеги», «Серенада», Ж.Косма çырнă «Опавшие листья», вырăс халăхĕн «Коробейники» кĕввисене икĕ труба тата баянпа труба çинче выляса ватлăхра кунта пурăнакансене хăйсен профессиллĕ ăсталăхĕпе хавхалантарчĕç, труба çинче пирвайхи хут итлекенсене чĕрине çепĕç, ăшă туйăм, хаваслăх кĕртрĕç. Тĕл пулăва ертсе пыракансем ваттисемпе тĕрлĕрен пĕлÿ-ăнкару конкурсне ирттерчĕç, çĕнтерÿçĕсене парнесем пачĕç. Тĕл пулу вĕçленнĕ май Н.Иванов баян çинче выляса ватă çынсене чăваш халăх юррисене юрлаттарни пурне те килĕшрĕ.