11 октября 2008 г.
– «Урмарская» кайăк-кĕшĕк фабрики сулмаклă утăмсемпе аталанса пынинче пултаруллă ĕçченсен тÿпи пысăк. Механизаторсен хушшинче те, чăх-чĕп пăхнă çĕрте те йышлă вĕсем, – тулли кăмăлпа каласа парать хуçалăх пуçлăхĕ Н. Петров. Пултаруллисенчен пĕри чăх чĕпписене пăхнă çĕрте вăй хуракан Елена Николаева. Пĕр талăкри чăх чĕпписене 3 уйăха çитиччен ÿстерсе парать вăл. Çитĕнтернĕ чĕпсене ун хыççăн корпуссене куçараççĕ. Çамрăк чĕпсене юратса пăхни çитĕнÿсем тума май парать. Фермипе иртнĕ сакăр уйăхра чăх чĕпписен талăкри ÿт хушаслăхĕ 14,9 грамм пулнă пулсан, Лена пăхакан ушкăнрисем 16,2 грамм хушнă.
Фабрикăн тĕп зоотехникĕ Г. Алексеева чĕп кăларнă çĕрте тăрăшакан С. Шуринапа К. Иванован ĕçĕ-хĕлĕпе кăмăллă .
– Инкубаторта мĕн пур вăй-халне парса ĕçленипе пĕрлех хĕрÿ ĕççи вăхăтĕнче столовăйĕнче механизаторсемпе рабочисене тутлă апат пĕçерсе параççĕ, – тет Галина Ивановна.