08 октября 2008 г.
Пĕтĕм тĕнчери Универсиада чемпионĕн (1970), СССР рекордсменĕн, ХХ Олимп вăййисене хутшăннă Николай Пуклаковăн (Шăхаль) призĕсене çĕнсе илессишĕн ирттерекен кросс йăлана кĕчĕ темелле. Иртнĕ çул йĕркеленĕ ăмăртăва 300 яхăн спортсмен хутшăннăччĕ. Кăçал та унтан кая мар килнĕ. Çанталăкĕ ăмăр тăчĕ пулин те, çакă спортсменсене пĕрре те хăратмарĕ. Кашниех хăйĕн пултарулăхне кăтартма тăрăшрĕ.
Акă спортсменсем Спорт çурчĕ умне йĕркеленсе тăнă. Ăмăртăвăн тĕп судйи Л.Агапова спортсменсем ăмăртăва хатĕрри çинчен район пуçлăхĕн ĕçĕсене вăхăтлăха туса пыракан Н.Павлова рапорт парать.
- Хаклă спортсменсемпе хăнасем! Вăрмар çĕрĕ пултаруллă спортсменсемпе пуян. Пекинра иртнĕ çуллахи XXIX Олимпиадăна пирĕн районтан кăна тăватă пултаруллă спортсмен хутшăнчĕ. Паян вара эсир Шăхальте çуралса ÿснĕ СССР чемпионĕн тата рекордсменĕн, Пĕтĕм тĕнчери Универсиада чемпионĕн, XX Олимп вăййисене хутшăннă Николай Иванович Пуклаков çăмăл атлетăн призĕсене çĕнсе илессишĕн кĕрешетĕр. Вăл район çамрăкĕсемшĕн ырă тĕслĕх пулса тăрать. Халĕ Н.Пуклаков ĕçлекен Шупашкарти кооператив институчĕн дирекцийĕпе килĕшсе çак ăмăртăва кашни çулах ирттеретпĕр. Сире пурне те спортра хамăр ентеш пек пултаруллă ÿссе çитĕнме çирĕп вăй-хал, чăтăмлăх сунатăп, - тет Николай Анатольевич.
Унтан Шупашкарти кооператив институчĕн ректорĕ, ЧР Патшалăх Канашĕн депутачĕ В.Андреев сăмах калать. Вăл институт ĕçĕ-хĕлĕпе, унти спортсменсемпе паллаштарать. Паянхи ăмăртăва Н.Пуклаков хутшăнайманни, вăл хăйĕнпе пĕрле хăвăрт утас енĕпе тĕнче класлă спорт мастерне, тĕнче рекордсменкине А.Деверинскаяна, кафедра заведующине, çăмăл атлетика енĕпе спорт мастерĕн кандидатне Е.Зимзяевана тата ытти паллă спортсменсемпе студентсене илсе килни çинчен пĕлтерет.
- Пирĕн институтра Вăрмарсем те йышлă вĕренеççĕ. Вĕсен хушшинче пултаруллă спортсменсем те сахал мар. Сире спортра ăнăçусем сунатăп, - терĕ сăмахне вĕçлесе Валерий Витальевич.
Район пуçлăхĕн заместителĕ - вĕрентÿ тата çамрăксен политикин пай начальникĕ Ю.Соколов вĕренекенсем спортпа туслă пулни, хальхи вăхăтра ырă, сывă пурнăç йĕркине тытса пырас енĕпе акци пыни çинчен пĕлтерет.
Ăмăрту ялавне çĕклеме ăмăртусенче палăрнă чи пултаруллă спортсменсене ирĕк параççĕ. Чăваш Республикин Гимнĕ мăнаçлăн янăрать.
Л.Агапова тĕп судья ăмăрту йĕркипе паллаштарать.
Акă, ăмăртусем пуçланаççĕ. Старта чи малтанах 1997-1998 çулсенче çуралнă хĕр ачасем тухаççĕ. Вĕсем пурĕ 14-ăн. Стадионта пĕр çаврăм тумалла, 500 метр чупмалла. Финиша чи малтан М.Максимова (Вăрмарти пĕрремĕш вăтам шкул) çитрĕ. Иккĕмĕшпе виççĕмĕш вырăнсене Э.Иванова (Пинер) тата Т.Владимирова (Аслă Чак) йышăнчĕç.
Арçын ачасем те çак дистанцирех тупăшрĕç. Чи пултарулли Н.Михайлов (Вăрмарти пĕрремĕш вăтам шкул) пулчĕ. П.Тепловпа (Чупай) М.Алексеев (Кивĕ Вăрмар) иккĕмĕшпе виççĕмĕш вырăнсене тухрĕç.
1995-1996 çулсенче çуралнă хĕр ачасем 1000 метрлă дистанцире 35-ĕн тупăшрĕç. Е.Семенова (Пинер) пĕрремĕш вырăна тухрĕ. Ун хыççăн дистанцие К.Максимова (Арапуç), М.Васильева (Энĕшпуç) вĕçлерĕç.
Арçын ачасенчен малти призлă вырăнсене А.Кириллов (Чупай), Д.Максимов (Шăхаль), А.Ильин (Пысăк Енккасси) тивĕçрĕç.
1993-1994 çулсенчи 33 хĕр ача 1000 метра чупса тупăшрĕç. Çĕнтерÿçĕ ятне К.Линга, И.Топтыгина (иккĕшĕ те Чупай шкулĕнчен) тата О.Филиппова (Пинер) çĕнсе илчĕç.
Арçын ачасем 2000 метра чупрĕç, чи пултаруллисем В.Иванов (Чупай), В.Степанов (Аслă Чак), А.Андреев (Çĕнĕ Кинчер) пулчĕç.
1991-1992 çулсенче çуралнă хĕр ачасем стадионта 4 çаврăм турĕç, 2000 метрлă дистанцире тупăшрĕç. Пĕрремĕш вырăна М.Чумаковапа (Арапуç) А.Семенова (Вăрмарти пĕрремĕш вăтам шкул) тухрĕç. М.Семенова (Арапуç) - иккĕмĕш, А.Андреева (Кивĕ Вăрмар) виççĕмĕш вырăнсенче.
Арçын ачасенчен малти призлă вырăнсене И.Тимофеев, К.Питруков, Н.Федоров (пурте Вăрмарти пĕрремĕш вăтам шкултан) çĕнсе илчĕç.
Предприятисемпе организацисенче, учрежденисенче ĕçлекенсем те активлă хутшăнчĕç ăмăртăва.
29 çула çитичченхи хĕр ачасенчен пирĕн хăнасем - кооператив институтĕнчи Ю.Макарова, М.Мельникова пĕрремĕшпе иккĕмĕш вырăнсене йышăнчĕç. Т.Алексееван (Чупай) виççĕмĕш вырăнпа килĕшмелле пулчĕ.
Юниорсенчен С.Антонов (Вăрмар поселокĕ) чи пултаруллă пулнине кăтартса пачĕ, пĕрремĕш вырăна тухрĕ. Д.Ивановпа (Вăрмар поселокĕ) А.Сафьянов (кооператив институчĕ) иккĕмĕшпе виççĕмĕш вырăнсене пайларĕç.
60-69 çулсенчи арçынсенчен Вăрмар поселокĕнчи спорт ветеранĕ Н.Михайлов - пĕрремĕш, Кивĕ Вăрмарти К.Иванов иккĕмĕш вырăнсене тухрĕç.
Ăмăрту итогĕсене пĕтĕмлетме те вăхăт çитрĕ. Вăтам шкулсен командисем хушшинче, чи нумай очко пухса, пĕрремĕш вырăна Вăрмарти пĕрремĕш вăтам шкулти спортсменсем, иккĕмĕшне - Энĕшпуçсем, виççĕмĕшне Пысăкенккассисем йышăнчĕç. Тĕп шкулсенчен малти вырăнсене Чупайсем, Пинерсем, Аслăчаксем, Урнарсем çĕнсе илчĕç. Ăмăртура мала тухнă спортсменсене тĕнче класлă спорт мастерĕпе А.Деверинскаяпа кооператив институчĕн кафедра заведующийĕ Е.Зимзяева грамотăсемпе наградăларĕç, парнесем пачĕç.