08 октября 2008 г.
Ача-пăча сасси лайăх тесе юрланă мĕн авалтан. Ача сасси пÿрт тултарать, пурнас кун-çула тăсать тетпĕр пулин те çамрăксем пĕр-ик ачаран ытлашши çуратма шикленеççĕ темелле-ши е хăйсем çине яваплăх илме хăраççĕ-ши? Ку вăл хăйсен кăмăл-туйăмĕ.
- 2007 çултан пуçласа иккĕмĕш ача çуралсан патшалăх укçа-тенкĕ парса пулăшма пуçларĕ, ача амăшĕн сертификачĕсем параççĕ. Çумри мăшăр шанчăклă пулсан ача çуратма пĕрре те шикленмелле мар. Пирĕн вĕсем тăваттăн: аслă ывăл - Сергей 11 класра, Алена - 8, Алеша - 5 классенче вĕренеççĕ, кĕçĕнни - Анжелика 2 çулта кăна-ха. Паянхи куна савăнатпăр вĕсемпе, - тет Çитмĕш ялĕнчи Надежда Георгиевна Иванова. Ĕçчен те харсăр çемье теççĕ вĕсем пирки ял çыннисем те. Мăшăрĕ Михаил Викторович «Ямуков» хресчен (фермер) хуçалăхĕнче тракторпа ĕçлет. Фермер та ун çинчен ырă сăмах кăна каларĕ. Чăннипех те шанчăклă, ĕçлеме ÿркенмен, ачасене юратакан арçын вăл. Вăл çакна чăннипех те пурнăçра кăтартса панă. Кил-çурчĕ те тирпейлĕ, пахча-çимĕçĕ те туп-тулли. Кунсăр пуçне икĕ ача усрава илнĕ вĕсем: Виктория 7 класа çÿрет, тепĕр хĕр ача - Елизавета пĕчĕк-ха. Ивановсен халĕ 6 ача, 4-шĕ шкула, 2-шĕ Тупах ялĕнчи ача садне çÿреççĕ. Эпир вĕсем патĕнче пулнă кун пĕр ачи те килте çукчĕ. Кил хуçи хĕрарăмĕ Надежда Георгиевна хăйĕн тăван йăмăкĕпе Иринăпа пахчара ĕçлетчĕç. Кишĕрне кăларса хĕвел çине сарса хунă, хăйсем виноград тататчĕç. Вĕсем картиш тулли выльăх-чĕрлĕх, чăх-чĕп, лаша тытаççĕ. Килти ĕçсене тума трактор та пур.
Ивановсен малашлăхĕ пысăк - ачисене ÿссе çитĕнтерсе пурнăç çулĕ çине тĕрĕс-тĕкĕл кăларасси. Çапла пултăрччĕ.