04 октября 2008 г.
«Чувашское» пĕрлешÿре иртнĕ ăратлă выльăхсен республикăри куравне пирĕн районти «Урмарская» кайăк-кĕшĕк фабрики те хутшăннă. Унта фабрикăра çитĕнтерекен ăратлă чăхсен «Конкурент-3», кăрккасен «Белая широкогрудая», кăвакалсен «Пекинская», хурсен «Линдовская» йăхĕсене тăратнă. Кивĕ Вăрмарти ăратлă кайăк-кĕшĕк фабрикин экспоначĕсем выставкăри куравра чăннипех те тĕлĕнтернĕ. Ахальтен мар ĕнтĕ вĕсем выставкăна тăратнă кашни экспонатпах пĕрремĕш степеньлĕ аттестатсем тата диплом çĕнсе илнĕ, укçан премие тивĕçнĕ.
- Выставкăна хутшăнма тĕплĕн хатĕрлентĕмĕр. Фабрика директорĕпе Н.Петровпа профком председателĕ Г.Петров çине тăнипе ятарласа стенд туса хатĕрлерĕмĕр. Тăрăшни сая каймарĕ, пирĕн ĕçе тивĕçлипе хакларĕç, эпир диплом çĕнсе илтĕмĕр, - тулли кăмăлпа каласа парать Г.Алексеева тĕп зоотехник.
Курава республикăри тĕрлĕ районтан ăратлă выльăх ĕрчетекен хуçалăхсем, фермерсем сĕтлĕх тата ашлăх усракан мăйракаллă шултра выльăхсем, лашасемпе сыснасем, сурăхсем, хурт-хăмăр, кроликсем тата ыттисем те тăратнă.