04 октября 2008 г.
«Виçĕ çул хушшинче районсенче тата республикăн пĕчĕк хулисенче физкультурăпа сывлăха çирĕплетмелли комплекссен строительствин тулли сетьне тумалли пысăк программăна пурнăçлассине вĕçлемелле», - тесе палăртнă ЧР Президенчĕ Н. Федоров Патшалăх Канашне янă Çырăвĕнче. Пирĕн районта та ку комплекса хăпартассипе пур вăй-хăватпа тăрăшса ĕçлеççĕ. Çавна май нумаях пулмасть ĕçлĕ визитпа пирĕн района Чăваш Республикин физкультура, спорт тата туризм министрĕ А. Николаев çитсе курнă, сывлăха çирĕплетекен комплекса хăпартнă çĕрте пулнă, кунти ĕç-хĕлпе тĕплĕн паллашнă. Хальхи вăхăтра строительство ĕçĕсем графикпе килĕшÿллĕн пулса пыраççĕ. Комплексăн котельнăйне «çут çанталăк ырлăхĕ» кĕртессипе тăрăшаççĕ, стенасене шалтан штукатурка, сантехника ĕçĕсене тăваççĕ. Тĕп подрядчикĕ - «ПМК Водоснабжение» тулли мар яваплă общество. Пурĕ 60 миллион тенкĕлĕх строительствăпа монтаж ĕçĕсем пурнăçланă. А. Николаев министр строительство объектĕнче пулнă май ĕç хăвăртлăхне ÿстерме, ăна икĕ сменăпа йĕркелеме, кĕске вăхăтра ăшăпа тивĕçтермеллине каланă.