04 октября 2008 г.
Районти ача-сачĕсенче «Малышиада» спортпа сывлăх вăййисем ирттерни çинчен пĕлтернĕччĕ. Çак кунсенче вара Вăрмар поселокĕнчи ачасемпе çамрăксен спорт шкулĕнче районти пур ача-пăча сачĕсем хушшинче пĕтĕмлетÿ вăййи иртрĕ. Унта 7 коллективран ачасен командисем тупăшрĕç.
Мероприятие район пуçлăхĕн социаллă ыйтăвĕсемпе ĕçлекен заместителĕ - вĕрентÿпе çамрăксен политикин пайĕн начальникĕ Ю.Соколов уçрĕ. Ăмăртăва хутшăнакансене, воспитательсене çак уявпа саламланă май, вăл ачасен сывлăхне çирĕплетес, вĕсене физкультурăпа туслашма пулăшас ĕçре питĕ пысăк пĕлтерĕшлĕ пулнине палăртрĕ, çамрăк спортсменсене ăмăртура çитĕнÿсем тума сунчĕ.
Тупăшу программин кашни тапхăрĕ хăйне евĕр те тĕрлĕ енлĕ пулчĕ. Ачасем чупас, скакалкăпа сикес енĕпе ăмăртрĕç. Ритмика гимнастикипе ташăсем те юлашки вырăнта пулмарĕç.
Тапхăрсем хушшинчи тăхтавсенче те куракансене юрă-ташăсемпе шкула кайма çул çитмен ачасемех савăнтарчĕç.
Çивĕч кĕрешÿре нумайрах очкосем пухса пĕрремĕш вырăна Вăрмар поселокĕнчи «Березка», иккĕмĕшне «Зоренька», виççĕмĕшне Энĕшпуçĕнчи «Радуга» ача-пăча сачĕсен çамрăк спортсменĕсем тухрĕç.
Çак савăнăçлă спорт уявне хутшăннă пур командăн та райадминистрацин вĕрентÿпе çамрăксен политикин пайĕн дипломĕсемпе наградăларĕç, призсем парса чысларĕç.
Ирттернĕ спортпа сывлăх вăййи районти шкула кайма çул çитмен ачасен заведенийĕсенче çамрăк воспитанниксене физкультурăпа тата спортпа туслаштарма пысăк ĕç туса ирттернине кăтартса пачĕ.