04 октября 2008 г.
«Вăрмарти механика завочĕ» акционерсен уçă обществи çĕнĕрен «чĕрĕлсе тăнин» вăхăчĕ нумаях та иртмен пулин те, вăл районта, республикăра тата ун тулашĕнче те хăйĕн тулли хăвачĕсемпе палăрчĕ. Кăçалхи сакăр уйăх кăтартăвĕсем те курăмлă. Çак вăхăтра пурĕ 5 миллион та 300 пин тенкĕлĕх продукци туса кăларнă. Хальхи вăхăтра 30 тĕрлĕ паха продукци ăсталаççĕ кунта. Вĕсене вара Раççейĕн тĕрлĕ кĕтесĕсене ăсатаççĕ.
Ку общество кĕске вăхăт ра пурлăхпа техника базине те вăйлатма пултарчĕ. Кантур çуртне, цеха тĕпрен çĕнетнĕ, котельнăй тунă, завода хăтлăлатнă. Цехра тимĕртен алăксем, тĕрлĕ эрешлĕ решеткесем, картасем, çÿп-çап валли контейнерсем, пĕчĕк ещĕксем, мунча валли шыв ямалли тĕрлĕ виçеллĕ савăтсем, атă-пушмак çумалли савăтсем тата ытти хатĕрсем тăваççĕ. Çакăнпа çеç çырлахмаççĕ общество ĕçченĕсем. Лифтсем валли те саппас пайсем хатĕрлеççĕ. Кунта туса кăларакан материалсен хакĕ пурне те тивĕçтерет, ку е вăл таварăн пахалăхĕ те пысăк.
«Пуласлăх пирки паянах шутламасан, ыран кая юлма пултаран. Хальхи рынок тапхăрĕнче конкуренци пуç пулса тăрать. Çавăнпа та пĕр енлĕ кăна мар, тĕрлĕ енлĕ ĕçлеме тăрăшатпăр. Предприятисемпе организацисем, уйрăм çынсем панă заказсемпе ĕçлетпĕр. Акă нумаях пулмасть хута кайнă Пысăк Енккассинчи пĕтĕмĕшле пĕлÿ паракан вăтам шкул йĕри-тавра пирĕн ăста алăллă рабочисем тимĕр карта тытнă, хапха тунă. Çитес вăхăтра хамăр патăрта туса кăларнă изделисене сăн кĕртме ятарласа цех уçасшăн. Çапла майпа пирĕн патăрта туса кăларнă продукци хăйĕн чăтăмлăхĕпе, илемĕпе пурне те тивĕçтерĕ. Хальхи вăхăтра цеха, кантура «çут çанталăк ырлăхĕ» кĕртессипе тăрăшатпăр. Çитес çул Республика кунне тивĕçлипе хатĕрленме планлатпăр», - тет О.Венедиктов пуçлăх общество ĕçĕ-хĕлĕпе тĕплĕн паллаштарнă май.
Предприяти ăнăçлăхĕ - лайăх кадрсенче. Пурĕ 22 çын тăрăшса вăй хурать кунта. Кашни хăйĕн яваплăхне туйса ĕçлет, мĕн палăртнине вăхăтра тата пахалăхлă пурнăçлать. Çавăнпа та ку обществăра ĕç кал-кал пулса пырать. Ытларахăшĕ ялсенчен вăй хума килет. Кашни ĕçченпех пĕр чĕлхе тупать пултаруллă пуçлăх, клиентсене йышăнма та вăхăт тупать, вĕсен кăмăлне çавăрать.
Паян завод малалла çирĕп утăмсемпе аталанать. Вăл предприятисемпе организацисене, уйрăм çынсене çыхăну тытма чĕнет.