01 октября 2008 г.
Районти Спорт çуртĕнче ирĕклĕ майпа кĕрешсе пĕр тăван Таратинсен призĕсене çĕнсе илессишĕн республикăри турнир иртрĕ. Ăмăртăва Шупашкар, Канаш, Патăрьел тата пирĕн районăн çамрăк спортсменĕсем, пурĕ 5 команда, 50 спортсмен хутшăнчĕ.
Çакна палăртмалла: Кавалта çуралса ÿснĕ пĕр тăван Николай, Иван, Владимир Таратинсем тĕрлĕ çулсенче ирĕклĕ майпа кĕрешсе хисеп пьедесталĕ çине темиçе хутчен те хăпарса тăма тивĕçлĕ пулнă. Ялсенче ирттернĕ Акатуйсенче çĕнтерсе чи сумлă парне – така çĕнсе илнĕ. Николай 1971 çулта «Урожай» ирĕклĕ спорт обществăн Тĕп совечĕн чемпионĕ пулнă. Владимир – «Урожай» спорт обществăн Тĕп совечĕн призерĕ, классика тата ирĕклĕ майпа кĕрешсе Чăваш АССР чемпионĕ. Иван – спорт мастерĕ, «Чăваш Республикин физкультурăпа спортăн тава тивĕçлĕ ĕçченĕ» хисеплĕ ята тивĕçнĕ.
Акă спортсменсем пĕр рете йĕркеленсе тăнă. Чăваш Республикин Гимнĕ мăнаçлăн янăрать.
Ăмăртăвăн тĕп судйи А. Власов спортсменсем ăмăртăва хатĕрри çинчен район пуçлăхĕн заместительне Ю. Соколова рапорт парать.
– Вăрмар çĕрĕ чаплă спортсменсемпе пуян. Пекинра иртнĕ çуллахи XXIX Олимп вăйисене пирĕн районтан тăваттăн хутшăнчĕç. Пĕр тăван Таратинсем вара ирĕклĕ майпа кĕрешессипе чапа тухнă. Вĕсен спортри çитĕнĕвĕсем паянхи çамрăксене çĕнĕ ÿсĕмсем тума хавхалантараççĕ. Паян ăмăртăва хутшăнакансене ăнăçусем сунатăп, – тет Юрий Васильевич.
Кăçалхи турнира Иван Петровичăн 60 çулхи юбилейне халалланă май, ун ячĕпе ăшă сăмахсем тата парнесем нумай пулчĕç.
РФ Патшалăх Думин депутачĕ, ЧР ирĕклĕ майпа кĕрешĕвĕн федераци президенчĕ П. Семенов пултаруллă спортсмена физкультурăпа спорта тата ирĕклĕ майпа кĕрешессине аталантарма тивĕçлĕ тÿпе хывнăшăн Хисеп грамотипе наградăланă. Çак наградăна депутат ячĕпе РФ Патшалăх Думин депутачĕн помощникĕ, ЧР тава тивĕçлĕ тренерĕ В. Семенов пачĕ.
Унтан юбиляра РФ физкультурăн тава тивĕçлĕ ĕçченĕ, Чăваш ял хуçалăх академийĕн доценчĕ, физкультура кафедрин заведующийĕ А. Алексеев, «Чулхулари карас телефонсен çыхăнăвĕ» хупă акционерлă обществин пирĕн республикăри филиалĕн директор заместителĕ В. Маллин, Чăваш Республикинчи физкультурăпа спортăн тава тивĕçлĕ ĕçченĕ В. Смородинов, ирĕклĕ майпа кĕрешессипе тĕнче чемпионачĕн призерĕ А. Колесников, Пĕтĕм Раççейри категориллĕ судья А. Власов, спорт мастерĕ С. Сергеев, Чăваш Республикинчи физкультурăпа спортăн тава тивеçлĕ ĕçченĕ Ю. Архипов, Иван Петровичăн пиччĕшĕ Николай Таратин тата ыттисем саламларĕç.
Ăмăртавăн тĕп судйи А. Власов ăмăрту йĕркипе паллаштарать.
Часах ăмăртусем пуçланаççĕ. Пурĕ çичĕ ушкăнра ăмăртрĕç. Пирĕн район спортсменĕсенчен хăйсен виçисенче пĕрремĕш вырăнсене – Д. Скворцов, А. Таратина, А. Алексеев, О. Иванова, иккĕмĕшне – А. Пантелеймонов, А. Александров, П. Кузьмин, К. Миронова, Ю. Горшкова, виççĕмĕшне – А. Табаков, А. Кудряшов, А. Павлов, М. Иванова çĕнсе илчĕç.
Абсолютлă чемпион ята Шупашкарти Олимп резервисен училищинче вĕренекен Раççей спорт мастерĕ О. Иванова (Кавал) тивĕçлĕ пулчĕ.
Çĕнтерÿçĕсене грамотăсемпе наградăларĕç, медальсемпе хаклă парнесем пачĕç.