27 сентября 2008 г.
Пурнăçра ачасемшĕн тăрăшнинчен таса ĕç урăх çук. Пирĕн «Зоренька» ача садĕнче ĕçлекенсем те çакна лайăх ăнланаççĕ. Ачасем ырă, сывă çитĕнччĕр, çĕр-шыва юрăхлă граждансем пулса ÿсчĕр тесе тăрăшатпăр. Çавна май пĕчĕк шăпăрлансемпе кашни уйăхра тĕрлĕ мероприятисем ирттересси те йăлана кĕнĕ. Акă нумаях пулмасть «Малышиада» спортпа сывлăх вăййи ирттертĕмĕр. Унта шкул çулне хатĕрленекен 15 ача хутшăнма кăмăл турĕç. Кунта хĕрачасемпе арçын ачасем 30 метрлă дистанцие чупассипе, скакалкăпа сикессипе тата ытти тĕрлĕ спорт вăййисем выляссипе ăмăртрĕç. Пурте маттур та пултаруллă пулчĕç. К. Александрова, Н. Сорокина, В. Павлова тата Н. Николаев, К. Ендерев, В. Николаев чупассипе вара лайăх результатсем кăтартрĕç. Скакалкăпа сикессипе К. Артемьевпа К. Александрова çĕнтерÿçĕсем пулса тăчĕç. Чи пултаруллисене медальсем парса наградăланă.
Çак вăйăн сценарине музыкăпа вĕрентекен Е. Прокопьева хатĕрленĕ. Ăна йĕркеленĕ чухне ку е вăл ачан пултараслăхне, чăтăмлăхне, кĕвве мĕнле туйма пĕлнине шута илнĕ.
Ача сывлăхĕ физкультурăпа спорт вăййисене мĕнле хутшăннинчен чылай килет. Çавăнпа та «Зоренька» ача садĕнчи педагогсен коллективĕ çамрăк ăрăвăн сывлăхĕсене çирĕплетессипе вĕрентÿпе воспитани процесне пур майсене те кĕртет.