24 сентября 2008 г.
Чукун çул çинчи переездсем çинче хăрушлăх правилисене епле пурнăçланине тĕрĕслесе тăрасси транспорт прокуратурин тĕп ĕçĕсенчен пĕри пулса тăрать. Чăваш Республикин территорийĕнче чукун çул урлă çÿремелли 121 переезд, вĕсенчен 42-шĕ тĕрлĕ ведомствăсем çинче тăрать, «Раççей чукун çулĕсем» уçă акционерлă общество балансĕ çинче - 79. Кашни кварталта тĕрĕслев ĕçĕсем ирттеретпĕр, апла пулин те кашнинчех йĕркене пăснă тĕслĕхсем çиеле тухаççĕ, ытларах чухне юсав ĕçĕсем ирттернĕ чухне çирĕплетнĕ правилăсене пăсаççĕ. Ун пек 3 тĕслĕх тупса палăртнă, пĕр руководителе административлă йĕркепе уншăн штрафланă, дисциплина тĕлĕшĕнчен 4 çынна явап тыттарнă.
Профилактика ĕçĕсем тăтăшах ирттерни хăйĕн çимĕçне парать. Енчен те 2006 çулта республикăри переездсем çинче техника хатĕрĕсемпе çыхăннă 3 инкек пулса иртнĕ пулсан, 2007 çулта - 1, кăçал ку таранччен пулман. Инкек ан пултăр тесен транспорт прокуратурипе чукун çул ĕçченĕсем кăна ĕçлени çителĕксĕр, пурин те асăрханулăха çухатмалла мар.