Публикации » Ачасен пĕлĕвне çирĕплетрĕç

24 сентября 2008 г.

Иртнĕ эрнекун районти Куль­турăпа кану центрне ача садĕнчи тата шкулсенчи ачасемпе аш­шĕ-амăшĕсем пухăннă. Кунта çул-йĕрсем çинче инкексем ан пулччăр тесе ятарласа вĕрентÿ урокĕ майлă «Хăçан светофорсем юрлаççĕ» спектакль пулчĕ. Ăна райадминистрацин вĕрентÿ­пе çамрăксен политикин пайĕпе районти шалти ĕçсен пайĕн ГИБДД уйрăмĕ йĕркеленипе Шупашкартан района илсе килнĕ. Çакă республикăра «Асăрханăр, ачасем» уйăхлăх ирттернипе те çыхăннă. Çеçпĕл Мишши ячĕллĕ çамрăксен театрĕн артисчĕсем ачасене хăйсен пултарулăхĕпе тыткăнларĕç. Шăпăрлансем спектакльте интересленсе хăйсене чăн-чăн юмахри пекех туйрĕç пулас, хыттăн алă çупрĕç, артистсемпе пĕрле юрларĕç. Спектакль хыççăн артистсем ачасемпе çул-йĕр правилисем çинчен калаçу ирттерчĕç. Ачасем вĕсен ыйтăвĕсем çине пĕр харăссăн хуравларĕç.

Вĕрентÿ куравĕ пурне те ки­лĕшнипе пĕрлех мĕн пĕлнине татах та çирĕплетме пулăшĕ.