17 сентября 2008 г.
«Шоркистринский» производство кооперативĕн коллективĕ умра тăракан задачăсене ăнăçлă пурнăçлассишĕн кĕрешĕве вăйлатсах пырать. Кăçалхи сакăр уйăхра хастар рабочисем 1 миллион та 128 пин штук хĕрлĕ кирпĕч туса кăларнă. Керамблок кăларасси ÿссех пырать, сакăр уйăхра 66 пин штук хатĕрленĕ. Складсен заведующийĕ Л. Иванова пĕлтернĕ тăрăх хальхи вăхăтра строительство материалĕсене ытларах Тутар Республикинчен килсе илеççĕ тата уйрăм çынсем туянаççĕ. Кирпĕч тиенĕ çĕрте М. Петрова, М. Павлов, И. Николаева, Д. Сидоров рабочисем тăрăшса ĕçлеççĕ. И. Тукмаков крановщик шанса панă ĕçе тÿрĕ кăмăлпа пурнăçлать.
Керамзитпа бетон блокĕсем туса кăларакан цеха Н. Сергеев ертсе пырать. Е. Козлов, Н. Александров, А. Тукмаков, Г. Кузнецов рабочисем хăйсен мĕн пур тăрăшулăхне параççĕ.
– Сменăра 800 штук керамблок çапса кăлармалла пулсан, хастар рабочисем сменăри нормăна чылай ирттерсе пурнăçлаççĕ, – хавхаланса каласа парать цех начальникĕ Николай Иванович Сергеев.
Тĕп производствăсăр пуçне кирпĕч завочĕн коллективĕ тĕш тырă çитĕнтерет тата чылай пысăк лаптăк çинче çĕр улми туса илет.
Пултаруллă руководитель И. Иванов ертсе пынине коллектив умри тĕллевсене пурнăçа кĕртессишĕн ĕçри хастарлăх ÿстерсех пырать, ÿсĕмĕ те куçкĕрет.