00:00 09 марта 2010 г.
Районти тĕп библиотекăра йăлана кĕнĕ йĕркепе «Право» лекторин черетлĕ занятине «Наркотике çул çук» темăпа ирттернĕ. Унта 10-мĕш класс ачисемпе пĕрле районти прокуратура тата сывлăх сыхлавĕн работникĕсем хутшăннă. «Çул çитмен ачасем курăк хутăшĕ туртни» темăпа шкул ачисем хушшинче анкета ирттернин итогĕсемпе район прокурорĕн заместителĕ Г. Демьянов паллаштарнă. Çак темăпах районти тĕп больницăн врач-наркологĕ В.Семенов сăмах илнĕ. Ăнсăртран кам та пулин наркотикла япалапа усă курчĕ пулсан, район больници пулăшу пама яланах хатĕрри çинчен пĕлтернĕ.
Районти тĕп библиотека ĕçченĕсем Раççейре тата республикăра наркотикла япаласемпе усă курасси мĕнлерех шайра пулнин статистика кăтартăвĕсемпе паллаштарнă. Тĕл пулăва хутшăннисем валли ятарласа «Санăн сывлăху - санăн илемÿ» курав хатĕрленĕ. Çавăн пекех «Пурăнма право пур» фильмăн презентацийĕ пулнă. Çитес тĕл пулура çак фильма сÿтсе явма палăртнă.