00:00 02 марта 2010 г.
Кăçал пĕтĕм халăх чи пысăк уява - фашистсене çĕнтернĕренпе 65 çул çитнине уявлать. Пур шкулсенче те уява тивĕçлипе кĕтсе илес тесе тĕрлĕ мероприятисем ирттереççĕ. Акă нумаях пулмасть Кивĕ Вăрмарти вăтам шкулта та «Зарница» вăййи иртрĕ, унта 5-8 классем хутшăнчĕç.
Ăмăрту питĕ çивĕч кĕршÿре иртрĕ. Ачасен тĕрлĕ конкурссенче вăй виçмелле пулчĕ: стройпа тĕрĕс утасси, хаçат кăларасси, велосипедпа тĕрлĕ авăнчăксем туса ярăнасси, пневматикăлла винтовкăран тĕл пересси, аманнисене медицина пулăшăвĕ парасси, алă вăйĕ виçесси, турник çинче туртăнасси тата юрă юрласси.
Пур конкурсра та ачасем питĕ маттур пулнине кăтартрĕç, кашнинех çĕнтерÿçĕ пулас килет-çке. Чăн-чăн пулас салтаксем пекех тытрĕç ачасем конкурсра. Стройпа утас енĕпе 8-мĕш классене çитекенни пулмарĕ. Алă вăй виçессипе, юрă юрлассипе, медицина пулăшăвĕ парассипе, велосипедпа ярăнассипе 6-мĕш класра вĕренекенсем чи нумай балл пуçтарса 1-мĕш вырăна тухма пултарчĕç, 7-мĕш класра вĕренекенсем 2-мĕш, 8-мĕш классем 3 вырăна тивĕçрĕç. 5-мĕш классем те аслисенчен тĕслĕх илсе нумай вĕренчĕç.