00:00 01 января 2010 г.
Чăваш Республикин Культура, национальноçсен ĕçĕсен, информаци политикин тата архив ĕçĕн министерстви Чăваш Енри професси коллективĕсен пултарулăх проекчĕсене пурнăçа кĕртме Чăваш Республикин Президенчĕ 2010 çула уйăрнă икшер миллион тенкĕлĕх виçĕ гранта çĕнсе илес тĕллевпе республика конкурсĕ ирттерме йышăннă.
Конкурс тĕллевĕ - республика бюджетĕнчен патшалăх пулăшăвне пама тивĕçлĕ професси коллективĕсен пултарулăх проекчĕсене суйласа илесси.
Конкурса республикăри культурăпа ÿнерĕн професси учрежденийĕсем хăйсен театр, музыка, хореографи, ÿнер тата музей ĕçĕнчи унччен пурнăçламан çĕнĕ проекчĕсемпе хутшăнма пултараççĕ.
Палăртнă ĕçсене 12 уйăхран кая юлмасăр пурнăçламалла.
Сĕнÿсене 2010 çулхи январĕн 1-мĕшĕнчен пуçласа апрелĕн 30-мĕшĕччен çак адреспа йышăнаççĕ: Шупашкар хули, Президент бульварĕ, 17 çурт, ЧР Культура министерстви, 412 пÿлĕм.
Ыйтса пĕлмелли телефон: 62-03-65.
Конкурс пирки тĕплĕнрех ЧР Культура министерствин www.culture.cap.ru сайтĕнче пĕлме пулать.